Revolta në Parlament/ PS bën gati letrat: Të përjashtohen tre deputetë të PD-së

Sekretariati i Etikës do të mblidhet sot në një seancë online në orën 14:30. Grupi parlamentar i PS-së mblodhi firmat për të kërkuar përjashtimin e tre deputetëve të PD-së që dje shkaktuan kaos duke pamundësuar zhvillimin normal të seancës që zgjati vetëm pak minuta.

I pari për të cilin u kërkua përjashtimi me 10 ditë është Ervin Salianji, i cili u shfaq në foltore me dy tymuese, njërën prej të cilave ia mori një gardist, ndërsa deputeti e ndoqi nga pas duke i hedhur një karrige, por që nuk e preku. Dy të tjerët janë Edmond Spaho dhe Petrit Doda.

Që në nisje të seancës së djeshme deputetët e PD-së morën të gjitha karriget duke i grumbulluar në foltore. Sali Berisha ka deklaruar se nuk do të ketë jetë parlamentare normale nëse nuk plotësohen tre kushte; ngritja e komisioneve parlamentare, shqyrtimi i nismave të opozitës dhe pranimi i bashkë-kryetarit në reformën zgjedhore.