VIDEO/ Shpërthen vullkani në Islandë, evakuohen qindra banorë dhe turistë

Një vullkan ka shpërthyer në jug të kryeqytetit të Islandës, Reykjavik, duke detyruar autoritetet të evakuojnë qindra turistë dhe banorë nga zona.

Islanda, e njohur edhe si vendi i akullit dhe zjarrit për shkak të akullnajave dhe vullkaneve të saj, ka parë 11 shpërthime vullkanike në jug të Reykjavikut që nga viti 2021, kur sistemet gjeologjike të fjetura u riaktivizuan pas rreth 800 vjetësh.

Lava e vullkanit depërtoi nëpër barrierat mbrojtëse pranë qytetit të peshkimit Grindavík , duke nxitur një urdhër evakuimi. Banorët e Grindavik ishin kthyer në qytetin e tyre pas shpërthimeve të mëparshme, megjithëse shumica e shtëpive janë bosh për më shumë se një vit.

Shërbimet e urgjencës evakuuan gjithashtu banjën luksoze aty pranë “Blue Laguna’ disa orë para shpërthimit, pasi gjeologët kishin paralajmëruar për ngjarjen.

Sipas Rikke Pedersen, kreu i Qendrës Vullkanologjike Nordike në Islandë, shpërthimi ishte i ngjashëm në madhësi me atë të janarit 2024, i cili derdhi llavë në qytetin e Grindavík.

Shpërthimet në gadishullin Reykjanes deri më tani nuk kanë prekur drejtpërdrejt kryeqytetin Reykjavik dhe nuk kanë shkaktuar shpërndarje të konsiderueshme të hirit në stratosferë, duke rezultuar në prekjen e trafikut ajror.

Ekspertët islandezë parashikojnë se të ashtuquajturat “shpërthime të çarjeve “, të karakterizuara nga llava që rrjedh nga çarje të mëdha në koren e Tokës dhe jo nga krateret vullkanike, mund të përsëriten për dekada apo edhe shekuj.

Islanda, një ishull i Atlantikut të Veriut, shtëpia e afro 400,000 njerëzve, tërheq mijëra turistë çdo vit, të cilët vijnë për të eksploruar natyrën e saj të thyer, duke përfshirë gejzerët, burimet e nxehta dhe vullkanet. Islanda e ka shfrytëzuar këtë energji termike në avantazhin e saj, për të plotësuar nevojat e saj për energji.

Islanda shtrihet në majë të kreshtës së Atlantikut të Mesëm, ku ndahen pllakat tektonike të Euroazisë dhe Amerikës së Veriut, dhe është kryesisht e mbuluar me fusha të zeza llave të alternuara me akullnajat dhe tokat e mbuluara me myshk jeshil.