Balluku i injoroi, Berisha u del në mbrojtje banorëve të Hotolishtit, paralajmërimi për policinë: Mos zbatoni urdhra kriminelësh dhe komisarësh që bashkëpunojnë me bandat
Kreu i PD Sali Berisha u ka bërë thirrje punonjësve të Policisë së Shtetit që të mos i binden urdhrave sipas tij të dhëna nga drejtuesit e tyre të lidhur me krimin, por të jenë në shërbim të qytetarëve.
Ai u ndal edhe tek banorët e Hotolishtit, kërkesat e të cilëve u injoruan nga ministrja Belinda Balluku. Ai i ka siguruar ata se asgjë nuk do të bëhet në kundërshtim me vullnetin e tyre.
Nga Librazhdi ku ka prezantuar kandidatët e ASHM për zgjedhjet e 11 majit, Berisha u shpreh se çdo orë shtesë e efektivëve do të paguhet me ardhjen në pushtet të qeverisë demokratike, ndërsa u ka bërë thirrje të mos zbatojnë urdhra të dhëna nga persona të lidhur me krimin.
“Banorëve të Hotolishtit iu jap fjalën se asgjë nuk do bëhet në kundërshtim me vullnetin e tyre.
Se zgjidhja do jetë ajo që ata meritojnë dhe kërkojnë.
Dhe ata kanë të drejtë në çdo ligj kombëtar dhe ndërkombëtar të përfillen dhe të vendosin për fatin e tyre.
Kam një thirrje për anëtarët e forcave të policisë u bëj thirrje mos shkelmoni mbi djersën tuaj, mbi mundin tuaj, mbi sakrificat tuaja.
U garantoj se pas 11 Majit, çdo orë e tyre do paguhet, trajtim i ri për çdo polic. Por mos zbatoni urdhra kriminelësh, komisarë kriminelësh që bashkëpunojnë me bandat, zbatoni ligjin, jini shërbëtorë të vërtetë të ligjit dhe qytetarëve.”, tha ai.
