Përfundon kampionati në Francë, PSG feston titullin, fiton me përmbysje dhe “ndez motorët” para finales së Champions League

PSG e mbyll kampionatin francez me fitore, pasi në ndeshjen përmbyllëse të sezonit parizienët triumfuan me përmbysje 3-1 ndaj Auxerre. Miqtë realizuan të parët me Sinayoko në minutën e 30, por reagimi I ekipit të Luis Enriques do të vinte në pjesën e dytë, me vendasit që përmbysin shifrat me 3 gola, falë realizimeve të Kvaratchkleias që shënoi një dopietë dhe brazilianite Marquinhos. PSG e përfundon kampionatin me 84 pikë, duke festuar kështi titullin e 13 në histori e të 4 radhazi. Një ekip që dominon në dekadën e fundit në Francë, ndërsa tani synimi kryesor I parizienëve mbetet triumfi në finalen e madhe të Champions League, aty ku do të sfidojnë Interin mbrëmjen e 31 Majit në Mynih.

Marseille dhe Monaco janë dy ekipet e tjera që do të luajnë në Champions sezonin e ardhshëm, pasi e mbyllën kampionatin respektivisht në vendin e 2 dhe të 3.

Ekipi marsejez triumfoi me shifrat 4-2 në javën e fundit në Velodromë përballë Rennes, me ekipin e italianit De Zerbi që konfirmohet si forca e dytë këtë sezon në Ligue 1, gjithsesi ende shumë larg për të garuar për titull ndaj një ekipi si PSG.

Në vendin e 3 ndërkohë e mbyll Monaco, pavarësisht humbjes së thellë 4-0 ndaj Lens në javën e fundit, ekipi nga principate do të luaj në Champions sezonin e ardhshëm.

St.Etienne dhe Montpellier zbresin një kategori më poshtë, ndërsa Reims do të luajë në Play Out.