Situata te skuadra korçare pas zbritjes në të Parën, te Skënderbeu flitet vetëm për largime

Sezoni 2024-2025 rezultoi i dështuar për Skënderbeun, pasi skuadra korçare zbriti nga Superiorja në Kategorinë e Parë. Për momentin, skuadra po vijon pushimet dhe puna për sezonin e ri pritet që të fillojë nga fundi i muajt qershor.

Për momentin, nuk ka asnjë ide të shprehur në lidhje me të ardhmen e grupit të lojtarëve që mbylli kampionatin e fundit. Deri më tani janë përfolur 3 “divorce” te klubi korçar, ku të larguarit e parë janë Zhoao Felipe, Liridon Balaj, si dhe Mamane Amadou Sabo. Nuk përjashtohen edhe shitje, ku portierit Marko Alia i ka dalë emri në Azerbajxhan, ndërsa Ardit Nikaj përflitet për një rikthim në Shkodër.

Me fillimin e punës, pritet të shihet edhe fati i lojtarëve që Skënderbeu i ka pasur në huazim në sezonin e fundit, të cilët kanë kontribuar te Kastrioti, Kukësi, Besa apo edhe klube të tjera në Kategorinë e Dytë.