Lindsay Lohan mohon operacionet plastike: Thjesht kam ndryshuar stilin e jetesës

Lindsay Lohan i ka dhënë fund spekulimeve se i është nënshtruar një ndërhyrjeje kirurgjikale për lifting fytyre. Përfaqësuesja e saj konfirmoi se aktorja nuk ka bërë asnjë ndërhyrje kirurgjikale kozmetike, por thjesht ka përqafuar një stil jete më të shëndetshëm.

38-vjeçarja foli për transformimin e saj të jashtëm në një intervistë për revistën Elle më 27 maj, duke sqaruar se nuk ka kryer asnjë procedurë të tipit “facelift”, i cili zakonisht përdoret për të shtrënguar lëkurën e fytyrës dhe qafës për të luftuar shenjat e plakjes.

“Jam në një fazë të jetës ku pyes: kur do ta kisha bërë këtë operacion? Ku gjeta kohë? Kur ndodhi? Kjo ide më duket qesharake,” u shpreh aktorja me humor.

Përfaqësuesja e saj shtoi se thashethemet janë “vërtet dashakeqe” dhe theksoi:

“Fatkeqësisht, jetojmë në një kohë ku, sa herë që një grua duket mirë, menjëherë supozohet se ka bërë ndërhyrje. Askush nuk mendon se ndoshta ajo thjesht kujdeset për veten.”

Lohan e lidh ndryshimin në pamjen e saj me stilin e jetës që ka ndjekur pas lindjes së djalit të saj, Luai, të cilin e solli në jetë 22 muaj më parë me bashkëshortin e saj Bader Shammas.

“Çdo mëngjes pi një lëng me karotë, xhenxhefil, limon, vaj ulliri dhe mollë. Pij shumë çaj jeshil dhe shumë ujë. Jam e fiksuar pas panxharëve turshi – i vendos thuajse në çdo gjë,” tha aktorja.

Përveç dietës, Lindsay ndjek një rutinë rigoroze për kujdesin ndaj lëkurës.

“Pas lindjes, lëkura ime u bë shumë e ndjeshme, ndaj ndryshova gjithçka. Bëra analiza gjaku për të zbuluar alergjitë dhe eliminova ushqimet që nuk më bënin mirë,” tregoi ajo.

Pjesë e rutinës së saj është zhytja e fytyrës në ujë të akullt çdo mëngjes, përdorimi i serumëve të ndryshëm dhe trajtimet me lazer. “Që nga ajo kohë, gjithçka nisi të ndryshonte për mirë,” theksoi Lohan.

Megjithatë, ajo nuk i përjashton krejtësisht ndërhyrjet estetike. Me humor, ajo shtoi:

“Të gjithë bëjnë Botox. Dhe kush thotë se nuk e ka bërë, po gënjen.”