I vendosur, Vuçiç: Beogradi nuk është i gatshëm ta njohë pavarësinë e Kosovës

Presidenti i Serbisë, Aleksandar Vuçiç, deklaroi në Forumin GLOBSEC në Pragë se anëtarësimi i një shteti në Bashkimin Evropian është një vendim politik dhe jo një çështje bazuar në merita.

“Njerëzit në Evropë flasin për një qasje të bazuar në meritë, por kjo nuk ka ndodhur asnjëherë,” tha Vuçiç, duke shtuar se pengesa kryesore për Serbinë mbetet mosnjohja e pavarësisë së Kosovës.

Ai theksoi se Serbia respekton Kartën e Kombeve të Bashkuara dhe Rezolutën 1244, sipas të cilave Kosova është pjesë e Serbisë. Ndërkohë, 22 nga 27 vendet anëtare të BE-së kanë njohur pavarësinë e Kosovës, ndërsa 5 vende nuk e kanë bërë këtë, duke e bërë këtë çështje një bllokadë kryesore në rrugën e Serbisë drejt BE-së.

Gjatë forumit, Vuçiç u takua edhe me emisarin evropian për dialogun Kosovë-Serbi, Peter Sorensen, ku diskutuan për vazhdimin e bisedimeve nën ndërmjetësimin e Bashkimit Evropian, sfidat rajonale dhe ruajtjen e stabilitetit në Ballkanin Perëndimor.

“Përsërita përkushtimin e Serbisë për zgjidhje kompromisi përmes dialogut, me respekt për partnerët ndërkombëtarë dhe interesat e popullit tonë,” tha Vuçiç, duke theksuar se përparimi në dialog kërkon kthimin te çështjet e mbetura, si formimi i Asociacionit të komunave me shumicë serbe.