Kim Cattrall shpjegon pse e refuzoi fillimisht Samanthan në “Sex and the City”

Kim Cattrall fillimisht nuk e imagjinonte veten duke luajtur Samantha Jones në “Sex and the City”, siç e shpjegoi në një intervistë të kohëve të fundit, pasi e kishte refuzuar rolin katër herë përpara se ta pranonte përfundimisht. Duke folur për The Times, aktorja 69-vjeçare pranoi se kur bëri audicion për serialin e famshëm në moshën 41 vjeçare, personazhi i dukej “i tepërt”. Ajo vuri në dyshim nëse mund ta bindte audiencën se një grua mbi 40 vjeç mund të ishte seksi.

“Ishte diskriminim ndaj moshës që ia kisha imponuar vetes”, tha Cattrall me humor. “Por kjo ndryshoi – 40 vjeç u bë seksi. U bë, ‘Po, duam më shumë se kaq’”, shtoi ajo.

Edhe pse shumë e kanë përshkruar Samanthën si tepër të preokupuar me jetën e saj dashurore, Cattrall këmbëngul se ky element ishte zemra e forcës së personazhit. “Ajo nuk ishte nimfomane – disa mund ta kenë menduar kështu – ajo thjesht shijonte ‘pjatën kryesore’. Kur të gjithë të tjerët hanin ushqime të lehta, ajo shkonte direkt te bifteku. Dhe gjithmonë sipas kushteve të saj, unë këmbëngula në këtë që nga fillimi”, theksoi ajo.

Megjithatë, ajo e bëri të qartë se është shumë ndryshe nga Samantha në jetën e saj personale: “Unë jam krejt e kundërta e saj në shumë mënyra. Unë jam në thelb monogame dhe më shumë se kaq “, theksoi ajo.

Në vitet e fundit, disa fansa të “Sex and the City” e kanë pasur të vështirë të pranojnë distancën e Cattrall nga seriali. Megjithatë, ajo tani është pajtuar me rolin e saj: “Krijova një personazh fantastik që e desha dhe i dhashë shumë dashuri. Dhe nëse më kujtojnë vetëm për këtë, atëherë kjo është absolutisht në rregull“, sqaroi ajo.