Aksident tragjik në një autostradë në Itali, një i vdekur dhe pesë të plagosur, mes tyre tre fëmijë

Një aksident i rëndë rrugor ka ndodhur në orët e para të mëngjesit të së dielës, pak para orës 05:15, në autostradën A22 të Brennerit, në zonën e Bolzanos, Itali. Ngjarja ka rezultuar fatale për një person, ndërsa pesë të tjerë kanë mbetur të plagosur, përfshirë edhe tre fëmijë.

Sipas të dhënave paraprake, aksidenti është shkaktuar nga një automjet që ka hyrë në mënyrë të gabuar në autostradë nga pika e pagesës në Bolzano Jug, duke lëvizur në drejtim të kundërt (veri) dhe është përplasur frontal me një automjet tjetër që po lëvizte në drejtimin e duhur.

Menjëherë pas ngjarjes, në vendngjarje kanë ndërhyrë forcat zjarrfikëse të Bolzanos, policia rrugore dhe disa ekipe të emergjencës me autoambulanca.

Dy nga të plagosurit janë transportuar në spitalet e Bressanones dhe Trentos, ndërsa tre fëmijët, të moshave 8, 11 dhe 14 vjeç, janë dërguar me helikopter në Klinikën Universitare të Innsbruckut, ku ndodhen nën kujdes të specializuar.

Për shkak të aksidentit, në autostradën A22 janë krijuar kolona të gjata automjetesh, ndërsa autoritetet e trafikut kanë devijuar qarkullimin drejt rrugës shtetërore pranë Brennerit, për të shmangur bllokimin total të qarkullimit.

Autoritetet po hetojnë shkaqet dhe rrethanat e plota të aksidentit.