FOTO/ SHBA largoi avionët nga baza ajrore në Katar para sulmit iranian, imazhet satelitore tregojnë pistat bosh

Një imazh satelitor i datës 19 qershor tregon se avionët amerikanë janë larguar nga baza ajrore Al Udeid në Katar, duke lënë pistat pothuajse të zbrazëta. Kjo lëvizje ka ndodhur para sulmit me raketa të Iranit ndaj kësaj baze, i kryer këtë të hënën në përgjigje të sulmeve ajrore të SHBA-së mbi objektiva bërthamore iraniane gjatë fundjavës.

Sipas dy zyrtarëve të mbrojtjes, që kanë folur për CNN, zhvendosja e avionëve është pjesë e strategjisë së Pentagonit për të mbrojtur asetet dhe pajisjet amerikane në Lindjen e Mesme, në kuadër të tensioneve të përshkallëzuara mes Iranit dhe Izraelit.

Në të njëjtën kohë, të gjitha anijet luftarake të Marinës Amerikane që ishin të vendosura përpara në bazën detare Naval Support Activity Bahrain, baza detare amerikane në Bahrein, janë larguar nga porti javën e kaluar. Deri më tani nuk dihet destinacioni i avionëve dhe anijeve të zhvendosura.