Samiti i NATO-s në Hagë: Aleatët vendosin të rrisin shpenzimet e mbrojtjes në 5% të PBB-së deri në vitin 2035

Aleatët e NATO-s janë zotuar të rrisin ndjeshëm shpenzimet për mbrojtjen kolektive, me një objektiv ambicioz prej 5% të Prodhimit të Brendshëm Bruto (PBB) deri në vitin 2035. Kjo u bë e ditur në deklaratën përfundimtare të Samitit të NATO-s, që po zhvillohet në Hagë.

Sipas dokumentit, 3.5% e PBB-së do të destinohet për nevoja bazë të mbrojtjes, ndërsa deri në 1.5% do të shkojë për fusha të tjera të lidhura me sigurinë, si mbrojtja e infrastrukturës kritike dhe fuqizimi i industrisë ushtarake të Aleancës.

Ky vendim vjen në një kohë të tensionuar për sigurinë globale, ku NATO e cilëson Rusinë si një “kërcënim afatgjatë për sigurinë euroatlantike”, ndërsa nuk përjashton rreziqet e vazhdueshme nga terrorizmi.

Në deklaratë, aleatët përsërisin angazhimin për mbështetjen e Ukrainës, por nuk përmendin qartë një rrugë të mundshme për anëtarësimin e saj në Aleancë, ndryshe nga formulimet më të drejtpërdrejta në samitet e mëparshme.

Progresi në zbatimin e këtyre objektivave të rritura do të rishikohet në vitin 2029. Aktualisht, synimi i vendosur për vendet anëtare është 2% e PBB-së për mbrojtjen.