Ministri i Jashtëm izraelit: Bota ka detyrim të ndalojë Iranin nga armët bërthamore
Ministri i Jashtëm i Izraelit, Gideon Sa’ar, ka bërë një deklaratë të fortë në rrjetin social X, duke theksuar se komuniteti ndërkombëtar ka detyrimin moral dhe strategjik për të ndaluar Iranin nga sigurimi i armëve bërthamore. Kjo deklaratë vjen vetëm pak ditë pas një sulmi të raportuar më 13 qershor nga Izraeli mbi objektet ushtarake dhe bërthamore të Teheranit.
“Izraeli veproi në momentin e fundit ndaj një kërcënimi të drejtpërdrejtë për veten, rajonin dhe komunitetin ndërkombëtar,” tha Sa’ar në një postim në platformën X, duke iu referuar sulmit të 13 qershorit ndaj objekteve ushtarake dhe bërthamore të Iranit.
Sipas tij, Irani vijon të përpiqet për zhdukjen e Izraelit dhe komuniteti ndërkombëtar duhet të veprojë me të gjitha mjetet për ta ndaluar që të sigurojë armën më të rrezikshme në botë.
Deklarata e Sa’ar vjen pas kritikave të ministrit të Jashtëm iranian, Abbas Araghchi, ndaj kreut të Agjencisë Ndërkombëtare për Energjinë Atomike (IAEA), Rafael Grossi, i cili kërkon të vizitojë objektet bërthamore të bombarduara nga SHBA më 22 qershor. Pas këtyre goditjeve, parlamenti iranian miratoi një ligj që pezullon bashkëpunimin me IAEA.
“Regjimi iranian vazhdon të mashtrojë dhe të pengojë inspektimet e vërteta ndërkombëtare,” tha Sa’ar, duke theksuar se agjencia e OKB-së për energjinë bërthamore është treguar e pafuqishme për vite me radhë përballë ambicieve të Teheranit.
