Britania shënon rekord gjashtëmujorin e parë, 20,000 emigrantë kaluan kanalin e La Manshit

Rreth 20,000 kërkues azili kanë kaluar Kanalin e La Manshit me anije të vogla që nga 1 janari dhe kanë mbërritur në Britani, duke vendosur një rekord për gjysmën e parë të vitit.

Këto mbërritje po rrisin presionet ndaj kryeministrit Keir Starmer, i cili po kërkon mënyra për të ulur numrin e tyre.

Të hënën u regjistruan 879 migrantë të tjerë që mbërritën në Britani, duke çuar totalin në 19,982 në gjashtë muaj, një rritje prej 48% krahasuar me vitin e kaluar (13,489) dhe 75% më shumë se në 2023 (11,433).

Ky është gjithashtu rekordi më i lartë gjysmëvjeçar që nga viti 2018, kur filluan të regjistroheshin mbërritjet e migrantëve në Britani.

Starmer po përballet me presion për të adresuar problemin dhe është zotuar se do të “shkatërrojë bandat” e trafikantëve.

Qeveria njoftoi se mbi 24,000 persona pa të drejtë qëndrimi në Mbretërinë e Bashkuar janë dëbuar që nga korriku i kaluar. Ajo shton se moti i mirë dhe teknikat e reja që lejojnë më shumë njerëz në anije po rrisin numrin e kalimeve.

Në vitin 2024, 73 persona kanë humbur jetën duke u përpjekur të kalojnë Kanalin e La Manshit.