Netanyahu: Ka një mundësi të mirë për armëpushim në Gaza dhe lirimin e pengjeve

Kryeministri izraelit Benjamin Netanyahu deklaroi se ekziston një “mundësi e mirë” për të arritur një marrëveshje armëpushimi me Hamasin, që do të përfshijë edhe lirimin e pengjeve të mbetura në Rripin e Gazës.

Deklarata u bë gjatë një interviste për Fox Business, pak para takimit të tij me Sekretarin amerikan të Mbrojtjes, Pete Hegseth, në Pentagon. Netanyahu konfirmoi se negociatat po zhvillohen me intensitet në Doha, me ndërmjetësimin e Katarit, Egjiptit dhe SHBA-ve.

Një zyrtar izraelit, cituar nga Times of Israel, bëri të ditur se një nga pikat kyçe të ngërçit është kërkesa e Izraelit për të ruajtur praninë ushtarake në Gazë, veçanërisht në Korridorin Morag, në veri të Rafahut. Edhe nëse firmoset armëpushimi, Izraeli synon të mbajë forcat në atë zonë strategjike.

Netanyahu, nga ana tjetër, theksoi se paqja në rajon mund të vijë vetëm përmes forcës, duke iu referuar qasjes së tij në politikën e jashtme dhe bashkëpunimit me ish-presidentin amerikan Donald Trump. Ai përmendi gjithashtu Marrëveshjet e Abrahamit si shembull të suksesit të “doktrinës së paqes përmes forcës”.

“Ne kemi treguar forcë të madhe dhe duket se po jep fryte për paqen,” u shpreh Netanyahu, duke nënvizuar se kjo mund të ndihmojë në zgjerimin e bashkëpunimeve rajonale dhe në krijimin e një realiteti të ri në Lindjen e Mesme.