VIDEO/ Përmbytje masive në Kinë: Evakuohen mbi 10 mijë persona, 2 viktima në Yunnan

Mbi 10 mijë banorë janë evakuuar në Kinën jugperëndimore për shkak të reshjeve ekstreme dhe përmbytjeve që kanë goditur disa provinca të vendit. Autoritetet raportojnë për 25 lumenj që kanë tejkaluar nivelet e sigurisë, ndërsa situata po përkeqësohet ndjeshëm.

Përmbytjet kanë shkaktuar krizë humanitare dhe dëme të mëdha ekonomike, duke rrezikuar sektorin bujqësor, i cili vlerësohet të ketë një ndikim prej 2.8 trilionë dollarësh. Ekspertët i lidhin këto zhvillime me ndryshimet klimatike dhe theksojnë se infrastruktura e vjetruar e menaxhimit të përmbytjeve është në rrezik kolapsi.

Në Pekin, reshjet përfshinë mëngjesin e sotëm, me 68.2 mm shi për një orë vetëm në distriktin Chaoyang, duke shtuar frikën për përmbytje urbane.

Në provincën Guizhou, lumi Qishui ka arritur nivelin më të lartë që nga viti 1953. Në Sichuan, lumi Xiaocao është në pikën më të lartë të 29 viteve të fundit. Chongqing dhe Yunnan po ashtu janë nën alarme të larta për shkak të rrezikut që lumenjtë të dalin nga shtrati.

Në Zhaotong, provinca e Yunnan, dy persona humbën jetën si pasojë e motit ekstrem. Në një tjetër qark të Yunnan, janë regjistruar 227.8 mm shi për 24 orë, duke thyer rekordin që nga viti 1958.

Autoritetet shëndetësore në Pekin kanë lëshuar paralajmërime për rrezikun e kontaminimit të ujit dhe ushqimeve, për shkak të përzierjes së reshjeve të dendura me temperatura të larta dhe lagështi ekstreme, që favorizojnë përhapjen e sëmundjeve infektive.