Gabimi fatal pas rrëzimit të Air India me 260 viktima, furnizimi me karburant i motorëve u ndërpre në mënyrë të mistershme! Panik në kabinën e pilotit: “Pse e bëre këtë?!”

Një raport paraprak mbi rrëzimin e aeroplanit të Air India që vrau 260 persona një muaj më parë ka zbuluar detaje të reja që ngrenë edhe më shumë pyetje dhe shqetësime.

Sipas raportit paraprak nga Dega e Hetimit të Aksidenteve Ajrore (AAIB), furnizimi me karburant i motorëve të aeroplanit duket se është ndërprerë disa minuta pas ngritjes, duke çuar në rrëzimin tragjik të tij.

Siç thuhet në raport, çelësat e furnizimit me karburant të dy motorëve u zhvendosën nga pozicioni i funksionimit (RUN) në pozicionin e ndalimit (CUTOFF) njëri pas tjetrit, brenda vetëm një sekonde.

Kjo rezultoi në uljen e ndjeshme të rrotullimeve të motorëve, pasi ata nuk furnizoheshin më me karburant.

Ky zhvillim shkaktoi konfuzion të madh në kabinën e pilotit, siç tregohet nga regjistrimi audio i dialogëve në kabinën e pilotit.

Njëri nga dy pilotët e pyeti tjetrin se pse e “ndërpreu” furnizimin me karburant, ndërsa ky i fundit i përgjigjet se nuk e kishte bërë.

Pavarësisht përpjekjeve për të rinisur të paktën një motor, avioni nuk arriti të rifitonte shtytjen e nevojshme dhe humbi lartësinë me një shpejtësi që nuk mund ta kthente mbrapsht.

Disa minuta më vonë, avioni u rrëzua në një zonë me popullsi, duke vrarë 241 pasagjerë dhe 19 persona në tokë. Përplasja dhe zjarri që pasoi dogjën automjete, shtëpi dhe gjithçka tjetër përreth vendit të tragjedisë.

Raporti paraprak, i përgatitur 30 ditë pas aksidentit, nuk jep ende përgjigje përfundimtare se si dhe pse u ndërpre furnizimi me karburant.

Megjithatë, ky është hapi i parë në një hetim të gjatë që pritet të hedhë dritë mbi rrethanat e sakta të aksidentit tragjik dhe t’u përgjigjet pyetjeve në lidhje me gabime të mundshme njerëzore ose teknike.