Kamioni përplaset me një automjet në tunel, tre viktima dhe dy të plagosur rëndë
Një aksident i rëndë rrugor ka ndodhur mesditën e së martës në autostradën A1 në provincën e Firences, përgjatë segmentit Variante di Valico, brenda tunelit “di Base”. Ngjarja tragjike u regjistrua rreth orës 14:30, kur një kamion u përplas me një automjet tip veturë, duke shkaktuar vdekjen e tre burrave dhe plagosjen e rëndë të një gruaje 35-vjeçare dhe një vajze të mitur.
Sipas hetimeve paraprake, automjeti i viktimave dyshohet se është ndalur papritur brenda tunelit, duke u bërë shkak për aksidentin fatal. Disa makina që udhëtonin pas tij arritën të shmangnin përplasjen, por jo edhe kamioni, i cili nuk mundi të frenonte në kohë dhe u përplas me forcë me veturën.
Autoritetet italiane kanë nisur hetimet për të përcaktuar shkakun e saktë të ndalimit të papritur të automjetit. Po analizohen pamjet filmike të kamerave të sigurisë të vendosura në tunel për të sqaruar në detaje rrethanat e ngjarjes.
Forcat zjarrfikëse dhe ekipet e emergjencës mbërritën menjëherë në vendngjarje, por për fat të keq, mjekët konstatuan vdekjen e menjëhershme të tre personave. Ndërkohë, gruaja e plagosur rëndë u transportua me helikopter në një spital të specializuar në gjendje kritike për jetën. Edhe vajza e mitur u dërgua me urgjencë për trajtim mjekësor.
Për shkak të aksidentit, segmenti i autostradës midis Firenzuola dhe Badia, në drejtim të Bolonjës, u mbyll për disa orë, duke shkaktuar trafik të rënduar dhe vonesa të gjata në qarkullim. Autoritetet italiane u bëjnë thirrje drejtuesve të automjeteve për kujdes të shtuar në zonat me rrisk të lartë, sidomos brenda tuneleve.
