Qarkullonte me armë zjarri në makinë, arrestohet 31-vjeçari, procedohet edhe shoferi. Pamjet nga arrestimi

Një 31-vjeçar ka rënë në prangat e policisë pasi u kap me armë zjarri ndërsa udhëtonte me makinë në Tiranë. Në kuadër të operacionit të koduar “Fokusi”, efektivët e Komisariatit Nr. 4 goditën një rast të armëmbajtjes pa leje dhe sekuestruan armën së bashku me municion luftarak.

Operacioni u zhvillua në urën e Babrroit, ku policia ndaloi një automjet me dy persona në bord. Pas kontrollit, në derën e pasagjerit u gjet një armë zjarri pistoletë, që dyshohet se mbahej nga shtetasi E. M., 31 vjeç. Bashkë me armën, u sekuestruan edhe automjeti dhe dy celularë.

Për këtë rast u arrestua në flagrancë E. M., ndërsa drejtuesi i automjetit, shtetasi F. B., 27 vjeç, u procedua penalisht për moskallëzim krimi. Të dy janë banues në Tiranë.

Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për hetime të mëtejshme.