I dënuar për trafik droge, Apeli i GJKKO i ul dënimin Pashk Sylës! Nga 7 vite, në 4 vjet e 8 muaj burg

Gjykata e Posaçme e Apelit për Korrupsionin dhe Krimin e Organizuar ka vendosur të ulë dënimin për Pashk Sylën, i dënuar fillimisht me 7 vite burg për trafik droge nga Shqipëria drejt Greqisë.

Sipas vendimit të shpallur më 22 korrik 2025, trupa gjykuese e përbërë nga Igerta Hysi (kryesuese), Florjan Kalaja dhe Tereza Merkaj, vendosi ta lërë në fuqi vendimin penal të shkallës së parë, por me ndryshimin e uljes së dënimit me 1/3, në zbatim të nenit 406 pika 1 të Kodit të Procedurës Penale.

Vendimi:

Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Igerta Hysi (kryesuese), Florjan Kalaja (anëtar) dhe Tereza Merkaj (anëtare), më datë 22.07.2025, shpalli vendimin lidhur me çështjen e regjistruar me nr. 41 akti, datë 08.05.2025 regjistrimi, mbi ankimin e paraqitur nga i pandehuri P.S., ndaj vendimit nr. 11, datë 03.02.2025 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi:

1. Lënien në fuqi të vendimit nr. 11, datë 03.02.2025 të Gjykatës së Posaçme Shkallës së Parë për Korrupsionin dhe Krimin e Organizuar për të pandehurin P.S., me këtë ndryshim:
• Në zbatim të nenit 406 pika 1 të Kodit të Procedurës Penale, uljen e dënimit me 1/3 dhe dënimin përfundimisht të të pandehurit Pashk Syla me 4 (katër) vjet e 8 (tetë) muaj burgim.
2. Shpenzimet gjyqësore të gjykimit në apel, i ngarkohen të pandehurit.
3. Kundër vendimit mund të bëhet rekurs në Gjykatën e Lartë, brenda 45 (dyzet e pesë) ditëve, duke filluar ky afat nga e nesërmja e njoftimit të tij.
U shpall në Tiranë, më datë 22.07.2025.