Kapet në Shijak një person i dënuar në Itali për trafik droge, pritet të ekstradohet drejt Italisë

Policia ka arrestuar një 39-vjeçar të shpallur në kërkim ndërkombëtar, i dënuar nga drejtësia italiane për përfshirje në një organizatë kriminale që merrej me trafikun e lëndëve narkotike.

I ndaluari është Fatjan Stafa, i cili u lokalizua dhe u kap në fshatin Hardhisht të Shijakut. Autoritetet shqiptare kanë nisur procedurat për ekstradimin e tij drejt Italisë.

Sipas njoftimit zyrtar, Gjykata e Apelit e Firences, me vendim të datës 8 tetor 2024, e ka dënuar Stafën me 7 vjet, 7 muaj dhe 12 ditë burg për pjesëmarrje në një grup të strukturuar kriminal që trafikonte lëndë narkotike në territorin italian.

Njoftimi:

Policia e Shtetit

Finalizohet nga Drejtoria e Forcës së Posaçme Operacionale në DPPSh, në bashkëpunim me Sektorin e Forcës së Posaçme Operacionale të DVP Durrës, operacioni policor i koduar “Operacionalja 57”.

Kapet në një fshat në Shijak, një 39-vjeçar, i dënuar në Itali, me 7 vjet, 7 muaj e 12 ditë burgim, për pjesëmarrje në organizatë kriminale që trafikonte lëndë narkotike.

Në vijim të operacioneve të njëpasnjëshme për kapjen e shtetasve të shpallur në kërkim ndërkombëtar, strukturat e Drejtorisë së Forcës së Posaçme Operacionale në DPPSh, në bshkëpunim me Shërbimet Operacionale të DVP Durrës, finalizuan operacionin e koduar “Operacionalja 57”.

Gjatë këtij operacioni, u kap në fshatin Hardhisht, Shijak, dhe u arrestua me qëllim ekstradimin në Itali, shtetasi Fatjan Stafa, 39 vjeç, banues në fshatin Pjezë, Durrës.

Ky shtetas ishte shpallur në kërkim ndërkombëtar nga Interpol Roma, pasi Gjykata e Apelit e Firences, me vendimin e datës 08.10.2024, e ka dënuar me 7 vjet, 7 muaj e 12 ditë burgim, për për pjesëmarrje në organizatë kriminale për trafikimin e lëndëve narkotike.

Interpol Tirana vijon procedurat në bashkëpunim me autoritetet italiane, për ekstradimin e këtij shtetasi.