Mesha madhështore nga Papa Leo, marrin pjesë mbi 1 milion të rinj! Mesazhi i tij: Mos kërkoni përsosmëri të rreme, aspironi gjithmonë gjëra të mëdha dhe shenjtëri

Sot 3 gusht 2025, Papa Leo XIV mbajti një meshë madhështore në një hapësirë të hapur jashtë në Tor Vergata, ku morën pjesë mbi një milion të rinj katolikë nga e gjithë bota.

Ky ishte tubimi më i madh i besimtarëve që vendi ka parë në 25 vitet e fundit.

Në këtë shërbesë të organizuar si pjesë e Vitit të Shenjtë të Katolikëve, Papa u drejtoi të rinjve një mesazh frymëzues:

“Aspironi gjithmonë për gjëra të mëdha, synoni për shenjtëri, kudo që të jeni.”

Përveç Papës, në meshë morën pjesë 20 kardinalë, 450 peshkopë dhe 7,000 priftërinj katolikë, duke bërë kështu këtë tubim një ngjarje të jashtëzakonshme fetare dhe sociale.

Në fjalimin e tij, Papa Leo XIV kujtoi rëndësinë e pranimit të dobësive njerëzore, duke thënë:

“Anët tona të cenueshme janë pjesë e ekzistencës dhe entitetit tonë të mrekullueshëm.”

Ai bëri thirrje që të rinjtë të mos kërkojnë një përsosmëri të rreme, por të pranojnë veten me gjithë mangësitë.

Duke iu referuar një mesazhi të paraardhësit të tij, të ndjerit Papa Françesku, Papa amerikan theksoi:

“Të gjithë ne jemi të thirrur të përballemi me pyetje të mëdha, të cilat nuk kanë përgjigje të menjëhershme, por që na ndihmojnë të ecim përpara, të kapërcejmë kufijtë dhe të ngremë veten në lartësi të reja.”