Zyrtar i Trump akuzon Indinë: Po financon luftën e Rusisë në Ukrainë përmes naftës!
Një nga zyrtarët më të afërt të presidentit amerikan Donald Trump, Stephen Miller, ka akuzuar publikisht Indinë se po ndihmon financiarisht luftën e Rusisë në Ukrainë, përmes blerjeve masive të naftës nga Kremlini.
Në një intervistë për Fox News, Miller – zëvendësshef i kabinetit të Shtëpisë së Bardhë – u shpreh:
“Presidenti Trump ka qenë shumë i qartë: nuk është e pranueshme që India të financojë këtë luftë përmes naftës ruse. Kjo është shqetësuese dhe befasuese.”
Ai shtoi se shumë amerikanë do të mbeten të habitur kur të kuptojnë se India po qëndron krah për krah me Kinën në këtë praktikë tregtare që, sipas tij, ushqen makinerinë e luftës së Putinit.
Sipas burimeve të Reuters, India nuk ka ndërmend të ndalojë blerjet e saj, pavarësisht presionit amerikan. Ambasada indiane në Uashington nuk ka komentuar ende mbi akuzat e Miller.
Tensionet mes dy vendeve u përshkallëzuan më tej pas vendimit të SHBA-së për të vendosur tarifa 25% ndaj produkteve indiane, si përgjigje ndaj marrëveshjeve të Indisë për blerje të pajisjeve ushtarake dhe energjetike nga Rusia.
Presidenti Trump ka paralajmëruar gjithashtu tarifa deri në 100% ndaj çdo shteti që vijon importet e naftës nga Rusia, në rast se Moska nuk arrin një marrëveshje paqeje substanciale me Kievin.
Megjithë këtë qasje të ashpër, Miller theksoi se marrëdhëniet personale mes Trump dhe Modi mbeten “të shkëlqyera”, duke lënë të hapur një dritare për dialog strategjik mes dy vendeve.
