Administrata Trump vendos kusht të ri: S’ka fonde për emergjencat natyrore për shtetet që bojkotojnë kompanitë izraelite

Administrata e Donald Trump ka vendosur që shtetet dhe qytetet amerikane që bojkotojnë kompanitë izraelite do të përjashtohen nga fondet federale për emergjencat natyrore.

Agjencia Federale për Menaxhimin e Emergjencave (FEMA) ka njoftuar se për të përfituar nga një shumë prej 1.9 miliardë dollarësh, që mbulon pajisje kërkimi, paga emergjente dhe sisteme energjie rezervë, autoritetet vendore duhet të deklarojnë se nuk do të ndërpresin marrëdhëniet tregtare me biznese izraelite.

Ky vendim lidhet me fushatën ndërkombëtare BDS (Bojkot, Shitje, Sanksione), e cila synon të ushtrojë presion ndaj Izraelit për shkak të pushtimit të territoreve palestineze. Administrata Trump e ka cilësuar BDS-në si një lëvizje antisemitike.

Në një tjetër vendim në korrik, FEMA urdhëroi që një pjesë e fondeve për antiterrorizëm të përdoret për të ndihmuar autoritetet federale në ndalimin e emigrantëve – një tjetër prioritet i Trump.

Zëdhënësja e Sekretares së Sigurisë Kombëtare, Kristi Noem, u shpreh:

“Departamenti i Sigurisë Kombëtare do të zbatojë të gjitha ligjet kundër diskriminimit, përfshirë ato që kundërshtojnë BDS-në.”