OpenAI lançon GPT-5: Krijon softuer nga zero dhe përgjigjet në nivel doktorature

OpenAI ka lançuar GPT-5, modelin më të avancuar të inteligjencës artificiale deri më sot, i cili tashmë është i aksesueshëm për të gjithë përdoruesit, edhe ata pa abonim.

Shefi ekzekutiv i kompanisë, Sam Altman, e cilësoi GPT-5 si “një hap të madh drejt inteligjencës artificiale në nivel njerëzor (AGI)”, duke theksuar se është më inteligjent, më i shpejtë dhe më i dobishëm se modelet e mëparshme.

“GPT-3 ishte si të flisje me një nxënës gjimnazi, GPT-4 si një student universitar. GPT-5 është hera e parë që duket sikur po flet me një ekspert të vërtetë në çdo fushë,” tha Altman.

Sipas OpenAI, modeli i ri mund të krijojë softuer nga zero, të ofrojë arsyetim logjik dhe induktiv në nivel doktorature, si dhe të japë përgjigje më të sakta e të ndershme.

GPT-5 është tashmë aktiv dhe ditët në vijim do të tregojnë nëse ky model është po aq revolucionar sa pretendohet.