“Sulmi ndaj News24, akt kriminal ndaj fjalës së lirë”- Partia e Lirisë: Alarmante për Shqipërinë! T’i kthehet menjëherë sinjali televizionit
Partia e Lirisë ka reaguar ndaj fikjes së sinjalit të News 24 dhe pengimit të gazetarëve për të hyrë në ambientet e punës, duke e cilësuar këtë një akt të paprecedent dhe kriminal ndaj fjalës së
Në një deklaratë publike, Sekretarja për Marrëdhëniet me Publikun, Arla Merja, e quajti këtë ngjarje “një sulm të drejtpërdrejtë ndaj medias së lirë dhe një akt censure brutal, i denjë për regjimet më të errëta të historisë”.
Sipas Merjas, kjo nuk është një masë e përkohshme, por një strategji e mirëmenduar për të mbyllur gojën e mediave dhe për t’i kthyer gazetarët në objektiva të një pushteti që i sheh si armiq.
Deklarata e Sekretares për Mardhëniet me Publikun në Partinë e Lirisë, Znj. Arla Merja.
Të nderuar qytetarë!
Fikja e sinjalit të News24 dhe pengimi i gazetarëve për të hyrë në ambientet e tyre të punës është një akt i paprecedent dhe kriminal ndaj fjalës së lirë. Ky është një sulm i drejtpërdrejtë ndaj medias së lirë, një akt censure brutal, i denjë për regjimet më të errëta të historisë, ku e vërteta mbahet peng dhe qytetarët privohen nga e drejta për t’u informuar.
Kjo ngjarje e rëndë shënon një kthesë alarmante për Shqipërinë. Nuk kemi të bëjmë thjesht me një konflikt apo masë të përkohshme, por me një strategji të mirëmenduar për të mbyllur gojën e mediave dhe për t’i kthyer gazetarët në objektiva të një pushteti që i sheh si armiq.
Edi Rama dhe regjimi i tij kanë treguar hapur se nuk e njohin kufirin kur bëhet fjalë për të kontrolluar fjalën e lirë. Këtë e dëshmoi qartë edhe drafti i ri i Kodit Penal, i cili është provë e hapur e tentativës për montimin e një diktature dhe instalimin e një regjimi, i cili priret tu privojë përveç mediave edhe të gjithë qytetarëve fjalën e lirë.
Nga presioni i vazhdueshëm mbi mediat, deri te aktet e hapura të dhunës dhe censurës, ky është vetëm hapi i radhës në rrugën e rrezikshme të një autokracie, ku arma më e fuqishme e pushtetit është frika dhe heshtja e detyruar.
Partia e Lirisë dënon me forcë këtë agresion të neveritshëm dhe kërkojmë rikthimin e menjëhershëm të sinjalit të News24, si dhe garantimin e plotë të të drejtës së gazetarëve për të punuar të lirë dhe pa presion. Çdo pengesë, çdo bllokim dhe çdo akt dhune ndaj medias është një goditje e rëndë ndaj demokracisë dhe një shkelje flagrante e të drejtave të njeriut.
Shqipëria nuk mund të pranojë të kthehet në një vend ku fjala e lirë shuhet me urdhra politike dhe ku gazetarët rrethohen me armë. Ky regjim duhet ndalur tani, përpara se të shuhet çdo dritë lirie në këtë vend.
