Loftus-Cheek e Pulisic nderojnë Milan, “djalli” rikthehet te fitorja, Allegri: Fitore e rëndësishme

Nën presion të fortë pas disfatës të papritur përballë Cremoneses në startin e Serie A, Milan reagon shpejt, del me 3 pikë nga transferta përballë Lecces duke qetësuar Allegrin dhe tifozët e “djallit”. Çdo përfundim tjetër, përveç fitores përballë Ramadanit me shokë, do të vinte në dyshim të fortë projektin e ri.

Milan e nisi sfidën “zjarr”, me Gabbia-n që gjeti rrugën e rrjetës pas vetëm 4 minutash lojë, por gjyqtari i takimit me ndihmën e sistemit VAR anuloi gjithçka për faull në sulm. Ashtu si në pjesën e parë, Milan e nisi me gol edhe fraksionin e dytë, me Gimenez që u koordinua saktë brenda në zonë, por sërish festa nuk ishte e plotë pasi këtë herë gjyqtari anuloi golin për pozicion jashtë loje.

Më në fund, pas disa përpjekjeve, në minutën e 66-të, askush nuk mund të ndalte festën e “djallit”, me Loftus-Cheek që me kokë brenda në zonë zhbllokoi rezultatin. Allegri hodhi në fushë edhe Pulisic, në të 86-ën ishte pikërisht sulmuesi amerikan që vulosi fitoren e Milan.

Ylber Ramadani, mesfushori kuqezi, zbriti në fushë si titullar dhe qëndroi deri në minutën e 81-të, i vlerësuar nga mediat me notën 6,2. Nga minuta e 63-të u aktivizua edhe Medon Berisha.

Suksesi i Milan në transfertë mori faqet e para të mediave italiane: “Max merr zjarr. Riniset Milan”, shkruan Corriere dello Sport.

Shijon këtë fitore trajneri Allegri: “Aspekti pozitiv i këtij takimi ishte fakti që krijuam raste, por duhet të përmirësojmë në mbrojtje. Ishte e rëndësishme të fitonim pas humbjes kundër Cremoneses. Kundër Lecces treguam përulësi, kujdes dhe durim, duhet të vazhdojmë kështu”, u shpreh Allegri pas ndeshjes i cili ndër të tjera vlerësoi edhe afrimin e radhës, Nkunku.

()