ÇIKLIZËM/ Pogaçar bën bis, kampion bote me 66 kilometër shkëputje
Ashtu si në vitin 2024 në Zvicër, slloveni Tadej Pogaçar e përsërit veten edhe në Ruandë, duke konfirmuar fanellën ylber të kampionit Botërorin e rrugës në çiklizëm. Në skenën magjepsëse të Kigali, ylli i skuadrës së Emirateve të Bashkuara Arabe lëshohet në një sulm vendimtar plot 104 km para finishit, dhe mbërrin i vetëm në vijën e fundit. Një tjetër kryevepër nga një kampion legjendar si Pogaçar, ndërsa Remko Evenepoel u rendit i dyti dhe vendi i tretë i takoi irlandezit Ben Heili.
GARA
Me një distancë prej 267.5 kilometrash dhe 6096 metra ngjitje, gara me start të përbashkët e Botërorit 2025 u zhvillua dje në Kigali të Ruandës. Faza e parë u karakterizua nga tentativa të shumta arratisjeje nga çiklistë që nuk pretendonin fitoren, ndërsa fatkeqësisht Julian Alafilip (Franca) detyrohet të tërhiqet që në fillim. Edhe Tom Pidkok (Britania e Madhe) duket menjëherë në vështirësi, teksa një grup prej shtatë çiklistësh mundohet të shkëputet.
Pika kyçe e garës vjen 104 km nga fundi, kur Tadej Pogaçar (Sllovenia) lëshon sulmin e tij të fuqishëm. Fituesi i fundit i Turit të Francës shton ritmin dhe hap menjëherë një diferencë, duke e vënë në vështirësi të madhe rivalin e përhershëm, Remko Evenepoel (Belgjika). Kampioni në fuqi i kronometrit, i cili vetëm një javë më parë ia kishte marrë fitoren Pogaçarit në garën e kohës, nuk arrin të ndjekë ritmin dhe mbetet pas.
Ndërkohë, vetëm Isak Del Toro (Meksika) dhe Huan Ajuso (Spanja), të dy shokë ekiPi me Pogaçarit te UAE, arrijnë ta ndjekin përkohësisht. Mur de Kigali, ngjitja e famshme, bën që Pogaçar dhe Del Toro të shkëputen edhe nga Ajuso. Ndërkohë, një Evenepoel i nervozuar ndalet dy herë për të ndërruar biçikletën, duke humbur më shumë kohë. Pogaçar përpiqet të qëndrojë me Del Toron, por 66 km para finishit, meksikani i sinjalizon se nuk ka më fuqi, dhe slloveni vazhdon i vetëm drejt lavdisë.
NJË FITORJE HISTORIKE
“Kanibali” i çiklizmit modern shijon një tjetër triumf të gjatë dhe mbërrin i vetëm në finishin e Kigalit pas 6 orësh, 21 minutash dhe 20 sekondash, duke mbrojtur titullin dhe respektuar parashikimet. Pas fitores në Zvicër 2024, ai vendos kurorën edhe në Ruandë 2025, duke u bërë çiklisti i parë në histori që ngjitet në podium tre vite rresht në të dy evenimente si Turi i France dhe Kampionatin Botëror.
Medalja e artë mbetet kështu në Slloveni, ndërsa Evenepoel, pavarësisht problemeve, rikthehet fuqishëm në fund dhe e mbyll i dyti, me një vonesë prej 1 minutë e 29 sekonda. Podiumin e plotëson irlandezi Ben Heili, i cili mposhti në sprintin final danezin Matias Skjelmose në duelin për vendin e tretë. Me 66 km shkëputje në krye, Pogaçar ka shkruar edhe një rekord historik, pasi askush më parë nuk kishte fituar një garë klasike, apo një botëror me kaq shumë kilometra “pedalim solo”.
© BalkanWeb
