Justin Bieber: Të mendosh për dikë tjetër është njësoj si të tradhtosh

Këngëtari kanadez dhe fituesi i çmimit “Grammy”, Justin Bieber, ka shkaktuar reagime të shumta në rrjetet sociale pas një diskutimi të bërë gjatë një transmetimi të drejtpërdrejtë në Twitch, ku foli për mënyrën se si ai e koncepton tradhtinë në martesë.

Gjatë bisedës, Bieber tha se për të, edhe një mendim i dëshirueshëm për një person tjetër mund të konsiderohet si formë tradhtie, duke e krahasuar me një veprim të vërtetë jashtëmartesë.

“Nëse mendon me dëshirë për dikë tjetër, është njësoj si të veprosh me të,” – tha këngëtari.

Ai vazhdoi duke bërë një krahasim filozofik: “Ashtu si të ndihesh me zemërim ndaj dikujt është si të kryesh një akt dhune ndaj tij, edhe dëshira për dikë tjetër është tradhti ndaj partnerit tënd.”

Deklaratat e tij ndezën debate të forta në internet. Reagimet ishin të ndara: disa përdorues e vlerësuan qëndrimin e tij si shenjë respekti për bashkëshorten, ndërsa të tjerë e kritikuan duke e quajtur të tepruar dhe jorealist. Shumë komente theksuan se mendimet janë të pakontrollueshme dhe nuk kanë peshë nëse nuk shndërrohen në veprim.

Këto deklarata vijnë në një moment të ndjeshëm për çiftin Justin dhe Hailey Bieber, të cilët prej më shumë se një viti janë në qendër të thashethemeve për probleme martesore.

Megjithatë, pavarësisht spekulimeve, çifti është shfaqur shpesh bashkë në publik. Hailey ka mohuar zërat në TikTok, ndërsa fansat kanë vënë re se disa nga këngët e fundit të Justin në albumin “Swag” përmendin sfida në marrëdhënie.

Burime pranë çiftit theksojnë se, edhe pse kanë kaluar periudha të vështira, ata mbeten të bashkuar dhe përballen me komentet me humor dhe qetësi.
Çifti së fundmi është bërë me një djalë, Jack Blue, dhe duket se po fokusohen në jetën familjare larg zhurmës mediatike.