Ndarja nga jeta e Fatos Nanos, reagon presidenti Begaj: Lideri i tranzicionit, do të mbahet mend si kryetari liberal dhe reformator

Presidenti i Republikës, Bajram Begaj, ka shprehur ngushëllimet e tij për ndarjen nga jeta të Fatos Nanos përmes një postimi në rrjetet sociale.

“Me hidhërim të thellë mësova ndarjen nga jeta të Fatos Nanos, liderit socialist dhe të tranzicionit të Shqipërisë në vitet ‘90 dhe 2000”, shkruan Begaj, ndërsa thekson se ai do të mbahet mend si lideri liberal dhe reformator.

Ish-kryeministri dhe lideri historik i Partisë Socialiste, Fatos Nano ndërroi jetë ditën e sotme, pak muaj pasi festoi 73-vjetorin e lindjes.

Pas disa javësh në gjendje të rëndë shëndetësore, Nano mbylli sytë përgjithmonë në një spital privat në Tiranë, ku po trajtohej për probleme kronike respiratore.

Sipas burimeve mjekësore, politikani i njohur ndodhej në spital që prej datës 8 tetor, ku qëndroi për 24 ditë nën kujdesin intensiv të mjekëve në repartin e reanimacionit.

Postimi i Begajt

Me hidhërim të thellë mësova ndarjen nga jeta të Fatos Nanos, liderit socialist dhe të tranzicionit të Shqipërisë në vitet ‘90 dhe 2000.

Fatos Nano do të mbahet mend si lideri liberal dhe reformator.

Ngushëllimet i shkojnë familjes, si dhe miqve e dashamirësve të shumtë të tij.

I paharruar!