“Më çoi buzë humnerës”/ Lady Gaga flet për betejën me shëndetin mendor
Lady Gaga, një nga performueset më ikonike dhe shumëplanëshe të kohës sonë, foli së fundmi rreth eksperiences së saj me shëndetin mendor gjatë xhirimeve të filmit të saj fitues të çmimit Oscar, A Star Is Born. Në një intervistë të sinqertë me Rolling Stone, këngëtarja dhe aktorja 39-vjeçare zbuloi se ishte nën ndikimin e litiumit gjatë xhirimeve të filmit të vitit 2018. Litiumi, i përshkruar shpesh për të menaxhuar simptomat e çrregullimit bipolar, luajti një rol të rëndësishëm në jetën e saj në atë kohë, megjithëse Gaga nuk ka zbuluar publikisht ndonjë diagnozë specifike.
“E bëra filmin “A Star Is Born” me litium”, tha Gaga për revistën. Filmi, me bashkëprotagonist Bradley Cooper, pati një sukses të madh, por duket se rruga prapa skenave nuk ishte aspak e lehtë për yllin e popit. Pas përfundimit të filmit, Gaga nisi turneun e saj botëror “Joanne”, i cili zgjati nga gushti 2017 deri në shkurt 2018.
Megjithatë, gjatë kësaj periudhe, shëndeti i saj mendor pësoi një dëm serioz. Gaga pranoi se pësoi një krizë psikotike gjatë turneut. “Një ditë motra ime më tha: ‘Nuk e shoh më motrën time’ dhe e anulova turneun”, kujtoi ajo.
Situata u përshkallëzua deri në atë pikë sa Gaga kërkoi kujdes psikiatrik. “Kisha nevojë të bëja një pushim. Nuk mund të bëja asgjë… U rrëzova plotësisht. Ishte vërtet e frikshme.”
Në atë kohë, Gaga pranoi se nuk mendonte se mund të shërohej. “Ndihem me të vërtetë me fat që jam gjallë,” rrëfeu ajo. “E di që kjo mund të tingëllojë dramatike, por ne e dimë se si mund të shkojë kjo.”
Rrefimi i saj hedh dritë mbi problemet me të cilat përballen shumë njerëz me shëndetin mendor ndërsa përballen me karriera të mbushura me presion të lartë.
