Serie A pa padron, pas 13 javëve të para, 7 skuadra pretendente për titull

Serie A këtë sezon po ofron një garë të ngushtë si rrallë herë: pas 13 javëve, 7 skuadra janë brenda vetëm 5 pikëve dhe në krye nuk ka një dominues të qartë. Bologna dhe Como janë surprizat që po sfidojnë pritshmëritë, ndërsa kampionati mbetet i paparashikueshëm deri në maj.
Megjithatë, përtej emocionit në renditje, niveli i lojës nuk po e ndjek të njëjtin ritëm.

Krahasimet me kampionatet e tjera tregojnë një futboll ende të ngadaltë, të ndërprerë shpesh dhe të fokusuar më shumë te rezultati sesa te spektakli. Shumica e skuadrave mbrohen me linja të ulëta, mbajnë të njëjtën strukturë taktike dhe krijojnë pak hapësira, duke prodhuar ndeshje të mbyllura dhe të parashikueshme.

Ka edhe përjashtime. Milani po sjell lëvizje të reja ofensive me dalje të lëvizshme nga prapa dhe me futje të mbrojtësve në zonat e avancuara, duke surprizuar kundërshtarët. Por skuadra që po tërheq më shumë vëmendjen është Como i Fabregas. Vetëm katër pikë larg kryesimit, ajo po luan një futboll modern, teknik dhe dinamik, ndryshe nga shumica e ekipeve italiane.

Me lojtarë të aftë teknikisht, me kombinime të shpejta dhe me përdorim të gjerë të hapësirave, Como po sjell një frymë të re – një shembull i një futbolli më ndërkombëtar brenda Serie A.Të shtunën testi ndaj Interit në “San Siro” do të jetë një prove e vërtetë për Comon, për të kuptuar më shumë lidhur me objektivat e kësaj skuadre këtë sezon, që duket se do të synojnë pjesëmarrjen në Evropë.

Kampionati është emocionues, por mbetet për t’u parë nëse cilësia e lojës do të arrijë nivelin e emocioneve që jep renditja.Një garë për titull me kaq shumë skuadra pretendente kishte sezone që nuk shihej në Itali. Mbetet për tu parë se sa prej tyre do të vijojnë të “pedalojnë” me kryesuesit deri në km e fundit të garës, aty ku situate do të bëhet sigurisht më e “nxehtë”.