Milan tenon goditjen e bujshme, Icardi prish marrëdhënien me Gallatën e i propozohet kuqezinjve
Në Milano dhe Stamboll merkatoja e janarit ka nisur të nxehet. Te Milani, pavarësisht paraqitjeve solide të Tomorit, Gabbiës dhe Pavloviç, kuqezinjtë kërkojnë të zgjerojnë alternativat në mbrojtje. Me vetëm De Winter dhe të riun Odogu si zëvendësues, drejtuesit po punojnë për një qendërmbrojtës të besueshëm dhe me kosto të ulët. Emri më i nxehtë është Axel Disasi i Chelseat, i cili po luan pak në Londër dhe shikon me interes një transferim në Serie A, ku raportet e mira mes dy klubeve mund ta thjeshtojnë operacionin. Në sfond mbetet edhe ëndrra romantike Thiago Silva, por mosha dhe rreziku për të prishur ekuilibrat e grupit e bëjnë pistën shumë të ftohtë.
Ndërkohë, një tjetër emër i madh bëhet qendër e diskutimeve—Mauro Icardi. Sulmuesi argjentinas, në krizë totale me Galatasarayn, ka shpërthyer pas humbjes në Champions duke lënë të kuptohet se lamtumira është afër. Mediat turke e akuzojnë se ka mendjen larg, ndërsa dëmtimi i rëndë i 2024-s dhe humbja e vendit të titullarit ndaj Osimhenit kanë thelluar përçarjen. Icardi, që ka kontratë deri në 2026, mund të largohet që në janar me çmim të ulët ose në verë me parametër zero.
Në Itali, profili i tij pëlqehet, sidomos nga Milani që kërkon një golashënues pas zhgënjimit Gimenez, por ekzistojnë dyshime për gjendjen fizike dhe sidomos për pagën e tij prej 11 milionë eurosh. Edhe Roma ka vështirësi të hapë këtë pistë, pasi synimi kryesor mbetet Zirkzee.
Tregu i janarit premton lëvizje të forta: Milani kërkon një mbrojtës të ri, ndërsa e ardhmja e Icardit mund të ndezë garën mes klubeve që duan një bomber me eksperiencë.
