Selvija niset sërish drejt Italisë, bën dedikimin prekës për Shpatin!
Selvija Jao, bashkëshortja e artistit të ndjerë Shpat Kasapi, ka ndarë sot me ndjekësit e saj një moment shumë prekës në rrjetet sociale. Ajo është nisur drejt Italisë, e shoqëruar vetëm nga djali i tyre, Roeli, duke bërë të ditur dhimbjen e madhe që mbart për humbjen e bashkëshortit.
Përmes një fotoje në “Instastory”, ku shfaqeshin biletat e avionit me destinacion Milano për datën e sotme, 14 Dhjetor, Selvija ka shkruar: “Sot do doja më shumë se gjithçka të kisha edhe biletën tënde në dorë”, duke e shoqëruar imazhin me këngën e Shpatit, “Kujtime m’ke lan”.
Ky udhëtim ka një ngarkesë emocionale të veçantë për familjen, pasi vetëm pak javë më parë Shpat Kasapi ndërroi jetë tragjikisht në Itali, aty ku dha frymën e fundit.
Burime pranë familjes bëjnë me dije se udhëtimi drejt Italisë ishte i lidhur me vizitat dhe trajtimet e specializuara për djalin e tyre, Roelin, që ka nevojë për ndihmë në lidhje me problemet në të folur. Selvija duket se ka vendosur të vazhdojë betejën e përbashkët të prindërve, duke u rikthyer në vendin ku humbi bashkëshortin, për të përmbushur misionin prindëror.
Ky moment prekës tregon forcën dhe vendosmërinë e Selvijes, e cila, pavarësisht dhimbjes së madhe, po vazhdon të kujdeset për të ardhmen e djalit të saj. Familja vazhdon të marrë mbështetje nga miqtë dhe ndjekësit, të cilët e shprehin çdo ditë solidaritetin dhe ngushëllimet e tyre.
