Djali i Rob Reiner-it, Nick, merret në pyetje pas vdekjes së prindërve të tij!
Nick Reiner po merret në pyetje nga Njësia e Grabid-homicideve e Departamentit të Policisë së Los Anxhelosit (LAPD) pas vdekjes së prindërve të tij, Rob dhe Michele Reiner. Burime të afërta me familjen i kanë thënë revistës PEOPLE se Nick dyshohet se i ka vrarë prindërit e tij, megjithatë policia nuk e ka konfirmuar këtë version dhe deri tani nuk është bërë asnjë arrestim. Sipas autoriteteve, askush nuk ndodhet në paraburgim.
Burime të shumta i kanë deklaruar PEOPLE se Rob dhe Michele Reiner u gjetën të pajetë në shtëpinë e tyre në Los Anxhelos, të dielën, më 14 dhjetor, nga vajza e tyre, Romy. Rreth orës 15:30, Departamenti i Zjarrfikësve të Los Anxhelosit (LAFD) u thirr për të ofruar ndihmë mjekësore. Me mbërritjen në vendngjarje, ekipet konstatuan se një burrë dhe një grua kishin ndërruar jetë. Sipas burimeve, viktimat ishin Rob dhe Michele.
Rob Reiner ishte një regjisor i njohur hollivudian, i famshëm për filma ikonë si The Princess Bride, When Harry Met Sally…, Misery dhe A Few Good Men. Ai dhe Michele u njohën gjatë punës në film dhe u martuan në vitin 1989, duke krijuar një familje me tre fëmijë, mes tyre edhe Nick.
Nick Reiner ka folur publikisht në të kaluarën për betejat e tij me varësinë, që nisën në adoleshencë dhe çuan deri në përjetimin e pastrehësisë. Në një intervistë të vitit 2016 për PEOPLE, ai shprehej se ishte rikthyer pranë familjes dhe po përshtatej sërish me jetën në Los Anxhelos.
Familja Reiner, në një deklaratë për Variety, ka kërkuar privatësi, duke shprehur dhimbjen e thellë për humbjen e papritur. Hetimet vijojnë.
