Reali mban hapin e Barçës, në Valencia i nderon Mbappe, Arbeloa: Është më i miri në botë, po ndjek CR7 (VIDEO)

Në Spanjë, beteja për titull vijon të jetë “flak”, me Barçën dhe Real Madrid që përplasen në distancë. Në kushte emergjence, me shumë mungesa, Arbeloa dhe të besuarit e tij dolën me 3 pikë nga transferta përballë Valencia-s pas suksesit 2-0. Sigurisht vuajtën jo pak, por në fund rëndësi kishin vetëm pikët e plota duke mos lejuar Barçën të arratiset.

Pa Vinicius, Bellingham e të tjerë, Reali hasi vështirësi në pasin final duke bërë që pjesa e parë të mbyllej në barazim pa gola. Më në fund, në minutën e 65-të, Carreras dribloi këdo i doli përpara, ishte dhe me fat, duke finalizuar më pas me plot klas brenda në zonë. Valencia jo vetëm që nuk u dorëzuan, por tentuan deri në fund të shmangin këtë humbje. Për të mbyllur llogaritë me Valencia-n mendoi i përhershmi Kylian Mbappe, me “bomberin” francez që realizoi golin e dytë dhe të qetësisë. Ky ishte goli i tij i 23-të vetëm në La Liga, shifra fantastike që kënaqin edhe trajnerin Arbeloa:

“Të vish në “Mestalla” është sikur të shkosh te dentisti. Të gjithë e dimë presion që ekziston këtu, por ne e menaxhuam mirë ndeshjen. Kylian Mbappe? Ai është futbollisti më i mirë në botë aktualisht. Ne mendonim se nuk do të shihnim më këtu një lojtar si C.Ronaldo, por Mbappe po shkon në të njëjtin drejtim”, u shpreh Arbeloa.