Jane Fallon zbulon diagnozën me kancer gjiri: U kap shumë herët

Autorja dhe producentja britanike Jane Fallon ka bërë të ditur se është diagnostikuar me kancer gjiri, një lajm që e ka ndarë publikisht vetëm një muaj pasi mori diagnozën. Megjithatë, ajo theksoi se sëmundja është zbuluar në një fazë shumë të hershme, gjë që i jep shpresë dhe optimizëm për trajtimin.

Fallon tregoi se gjithçka nisi pas një mamografie rutinë që kishte bërë pak para festave të fundvitit. Sipas saj, ajo nuk kishte asnjë simptomë dhe nuk dyshonte për asgjë, derisa një radiolog vuri re diçka të pazakontë gjatë kontrollit.

“Bëra një mamografi rutinë një javë para Krishtlindjeve. Nuk kisha asnjë simptomë, por një radiolog shumë i mirë pa diçka që nuk i dukej normale dhe më referoi për analiza të tjera, derisa përfundimisht bëra edhe një biopsi”, u shpreh ajo.

Që nga ai moment, Fallon ka kryer një sërë ekzaminimesh të tjera për të përcaktuar saktësisht zonën e prekur. Ajo pranoi se procesi nuk ka qenë i lehtë, pasi i është dashur të kalojë disa kontrolle të njëpasnjëshme, përfshirë mamografi të tjera, biopsi dhe rezonancë magnetike.

Megjithatë, autorja tha se ndihet e sigurt dhe e mbështetur nga mjekët, ndërsa operacioni i saj pritet të kryhet brenda dy javësh. “Po marr kujdes të shkëlqyer dhe besoj se gjithçka do të shkojë mirë”, u shpreh ajo.

Jane Fallon është prej shumë vitesh në një lidhje me komedianin e njohur britanik Ricky Gervais. Çifti janë bashkë që nga viti 1982 dhe, ndonëse nuk janë martuar kurrë, kanë folur shpesh për marrëdhënien e tyre të gjatë dhe të qëndrueshme.

Në intervista të mëparshme, Fallon ka thënë se sekreti i një lidhjeje të suksesshme është miqësia, humori dhe aftësia për të qeshur së bashku çdo ditë.