FOTO/ Milan bie në ‘Maradona’, Allegri del nga gara për titull: Diskutim i mbyllur (VIDEO)
Parashikohej si një ndeshje shahu mes Conte-s dhe Allegri-t, një sfidë e vendosur nga detajet dhe ashtu rezultoi. Napoli i falet një goli të Politano-s, një gol trepikësh që i dhuroi vendin e dytë në Serie A, parakalon Milan dhe vihet në ndjekje të Inter, aktualisht 7 pikë larg kreut. Në “Maradona” u zhvillua një ndeshje e fortë, e luftuar për çdo top dhe me pak raste për shënim. Napoli goditi vetëm 3 herë kuadratin, ndërsa Milan vetëm një herë, shumë pak për më marrë më shumë nga kjo transfertë.
Lëvizja fituese i shkoi Contes, me teknikun “azzurr” që në minutën e 74-ët hodhi në fushë Politano-n. 5 minuta lojë i mjaftuan sulmuesit italian, me këtë të fundit që ndoqi mirë një aksion të nisur nga këmbët e Alisson Santos dhe shumë pranë vijës fatale me një goditje të fortë mposhti portierin Mike Maignan. Goli i Politanos qëndroi në fuqi deri në fund me tifozët në Maradona që festuan gjatë për këtë sukses.
Në sytë e mediave, Napoli tani mund të jetë ekipi i vetëm anti-Inter: “Inter, mbetet vetëm Conte. Chivu+7 ndaj Napolit, eliminohet Milan”, shkruan La Gazzetta dello Sport në faqen e parë. “Conte e mban të gjallë, thyen edhe Milan, Napoli -7 nga Lautaro”, ishte titulli i përzgjedhur nga Corriere dello Sport.
Ashtu si mediat, edhe Allegri e sheh veten jashtë garës për titull: “Besoj se tashmë ky diskutim është mbyllur për ne. Inter ndodhet 9 pikë larg, sigurisht që në futboll mund të ndodh çdo gjë, por përpara nesh është edhe Napoli. Mendoj se duhet të përqendrohemi te sfida e radhës, ajo kundër Udineses. Sigurisht që Champions nuk do të vendoset të shtunën, ka ende shumë ndeshje në loje”, u shpreh Allegri pas humbjes kundër Napolit.
