Nga Polonia në Pragë! Kanye West njofton destinacionin e ri të koncertit
Pasi anuloi koncertet në Poloni dhe Francë për shkak të komenteve të tij antisemite, Kanye West do të performojë në Republikën Çeke, njoftoi drejtori i hipodromit Velka Chuchle në Pragë, ku do të zhvillohet eventi. Reperi 48-vjeçar pritet të performojë në kryeqytetin çek më 25 korrik, tha Suzana Rambova për AFP, pa dhënë detaje.
Reperi amerikan, i njohur edhe me nofkën Ye, i cili po përgatit një turne në Evropë në qershor dhe korrik, ka humbur shumë fansa dhe shumë kontrata komerciale vitet e fundit pas deklaratave të tij antisemite dhe raciste.
Ndër të tjera, në vitin 2023 ai kishte thënë se “adhuronte nazistët”, kishte nxjerrë në shitje në faqen e tij të internetit një bluzë të zbukuruar me një svastikë dhe kishte publikuar një këngë të titulluar “Heil Hitler” në maj 2025, e cila u ndalua nga platformat më të mëdha të transmetimit.
Në fillim të prillit, fituesit 24 herë të çmimit Grammy iu ndalua hyrja në Mbretërinë e Bashkuar për koncertet e planifikuara për korrik, ndërsa Holanda tha se nuk kishte plane për të ndaluar koncertet e tij të planifikuara për fillim të qershorit.
Vetë Kanye West njoftoi javën e kaluar se po shtynte koncertin e tij të 11 qershorit në Marsejë, përballë kundërshtimit nga autoritetet e qytetit dhe qeverisë të cilat e akuzuan atë për vërejtje antisemite.
