Erika Kirk flet pas të shtënave në WHCD, kritikon gazetarët e “desensibilizuar”

Erika Kirk ka reaguar ashpër ndaj mediave dhe së majtës politike pas incidentit me të shtëna që tronditi Darkën e Korrespondentëve të Shtëpisë së Bardhë në Uashington. nNë një video gati 9-minutëshe të publikuar më 29 prill, ajo deklaroi se në SHBA ekziston një “epidemi serioze dehumanizimi”, duke e lidhur këtë fenomen me rritjen e dhunës politike.

“Edhe pse kemi probleme të mëdha me emigracionin e paligjshëm, problemi më i madh është indoktrinimi dhe radikalizimi i qytetarëve tanë”, u shpreh ajo. Sipas Kirk, kjo klimë ka ndikuar drejtpërdrejt edhe në tragjeditë e fundit, përfshirë vrasjen e bashkëshortit të saj.

Incidenti ndodhi më 25 prill në hotelin Washington Hilton, ku të ftuarit – përfshirë Donald Trump dhe Melania Trump – u detyruan të strehoheshin ose të evakuoheshin menjëherë pas dëgjimit të të shtënave. Sipas raportimeve, një agjent i Shërbimit Sekret mbeti i plagosur gjatë përleshjes, ndërsa autori i dyshuar, 31-vjeçari Cole Tomas Allen nga Kalifornia, u arrestua dhe akuzohet për disa vepra të rënda penale, përfshirë tentativë për vrasjen e presidentit.

Ngjarja shkaktoi panik në sallë, ndërsa shumë të pranishëm u panë duke u fshehur nën tavolina. Edhe vetë Erika Kirk u filmua duke qarë dhe duke kërkuar të largohej sa më shpejt nga ambienti.

Në reagimin e saj, Kirk akuzoi drejtpërdrejt mediat dhe të majtën ekstreme për minimizimin e dhunës politike.

“Nuk ka pasur kurrë një president që është përballur me kaq shumë tentativa për atentat. Reagimi nga e majta ka qenë shpesh indiferent, madje në disa raste zhgënjim që sulmet nuk patën sukses”, tha ajo. Ajo shtoi se tragjeditë po bëhen gjithnjë e më të zakonshme në titujt e lajmeve, ndërsa media, sipas saj, nuk po i trajton me seriozitetin e duhur.

Deklaratat e Kirk vijnë edhe në një kontekst personal të dhimbshëm. Bashkëshorti i saj, aktivisti konservator Charlie Kirk, u vra në shtator 2025 gjatë një fjalimi në Utah Valley University.

Për këtë ngjarje është akuzuar një i ri 22-vjeçar, i cili përballet me akuza për vrasje të rëndë dhe krime të tjera.

Në videon e saj, Erika Kirk përmendi edhe sulmin e fundit, duke thënë se autori ishte një mësues shkolle, çka sipas saj tregon nivelin shqetësues të radikalizimit në shoqëri.

“Një mësues që ditën edukon fëmijët dhe natën përpiqet të ndryshojë historinë me plumba – kjo është realiteti me të cilin përballemi”, përfundoi ajo.