Victoria Beckham flet për herë të parë mbi “Brand Beckham”: Nuk ishte kurrë një plan

Victoria Beckham ka folur së fundmi për herë të parë mbi konceptin e njohur si “Brand Beckham”, një etiketë që prej vitesh i është vendosur familjes së saj dhe bashkëshortit, David Beckham.

Në një intervistë në podcastin “Aspire” të Emma Grede, 52-vjeçarja sqaroi se kjo ide nuk ka qenë kurrë një plan i qëllimshëm kur ajo dhe David Beckham u njohën. Sipas saj, gjithçka ka lindur natyrshëm, duke u formësuar nga karrierat e tyre individuale dhe suksesi publik.

“Kur u takova për herë të parë me Davidin, nuk kishte asnjë synim për të krijuar një ‘brand’. Ai ishte një djalë i Brylcreem-it, luante për Manchester United dhe bashkëpunonte me Adidas e Pepsi, ndërsa unë isha pjesë e Spice Girls. Pikërisht aty kam mësuar shumë për marketingun dhe ndërtimin e një imazhi publik,” u shpreh ajo.

Deklaratat e saj vijnë në një moment kur djali i madh i çiftit, Brooklyn Beckham, ka hapur debat mbi marrëdhëniet familjare. Në një deklaratë të mëparshme në janar, ai kishte pretenduar se “Brand Beckham” shpesh vendoset mbi familjen, duke sugjeruar se imazhi publik dhe paraqitjet në rrjete sociale kanë pasur prioritet ndaj jetës private.

Sipas tij, familja është përballur me presionin e vazhdueshëm për të ruajtur një imazh perfekt në publik, duke marrë pjesë në evente dhe fushata, edhe kur kjo ka qenë në kurriz të angazhimeve personale.

Deklaratat e Victoria Beckham duket se synojnë të sqarojnë se suksesi i tyre mediatik nuk ka qenë i ndërtuar me strategji të ftohtë, por ka ardhur si rezultat i karrierave dhe ekspozimit të gjatë në industrinë e muzikës dhe sportit.