Babai i Ervis Martinajt: SPAK nuk do ta zbardhë të vërtetën

Babai i Ervis Martinajt: SPAK nuk do ta zbardhë të vërtetën

Babai i Ervis Martinajt, Mustafa Martinaj, u paraqit për herë të dytë në Gjykatën e Posaçme në lidhje me procesin e konfiskimit të pasurive të tij. Ky proces përfshin konfiskimin e 34 pasurive të Ervis Martinajt dhe individëve të lidhur me të, të cilat vlerësohen në rreth 10 milionë euro. Seanca u shty përsëri për shkak të mungesës së dy avokatëve.

Pas seancës, Mustafa Martinaj shprehu shqetësimin e tij për mungesën e progresit nga autoritetet në zbardhjen e rastit të zhdukjes së djalit të tij. Ai tha në një bisedë me gazetarët se autoritetet nuk po e hetojnë rastin siç duhet, pavarësisht se i ka dhënë koordinatat dhe emrat e saktë.

“Nuk duan ta zbardhin, prandaj e lënë në Kurbin, pasi ua kam dhënë informacionin e nevojshëm,” deklaroi ai.

Mustafa Martinaj theksoi se drejtues të policisë kriminale kanë ndikuar në moszbardhjen e ngjarjes për një kohë të gjatë. “I kam thënë të gjitha në SPAK kur erdha për të dëshmuar me kërkesën time, por askush nuk është interesuar që atëherë,” përfundoi ai.

Në tetor të vitit 2025, babai i Ervis Martinajt bëri një kërkesë në Gjykatën e Lezhës për shpalljen zyrtare të djalit të tij si të zhdukur, një çështje që ende nuk ka marrë një vendim. Sipas Prokurorisë së Posaçme, për sa kohë nuk ka prova që të vërtetojnë të kundërtën, Ervis Martinaj vazhdon të konsiderohet i gjallë.

Ervis Martinaj është shpallur në kërkim ndërkombëtar me urdhër të SPAK, pas dëshmive të Nuredin Dumanit, i cili ka pohuar se Martinaj e kishte paguar 500 mijë euro për të eliminuar Indrit Doklen.