Kylie Jenner rrëfen jetën para famës: Isha vetëm 9 vjeçe kur nisi gjithçka

Kylie Jenner ka kujtuar jetën e saj para famës gjatë një interviste të fundit në podcast-in “Therapuss” me Jake Shane, ku u ndal te fillimet e reality show-t të famshëm “Keeping Up with the Kardashians”.

28-vjeçarja, e njohur si yll i reality show-t dhe sipërmarrëse në industrinë e kozmetikës, tha se i mban mend disi vitet para se kamerat të nisnin të ndiqnin familjen e saj, por kujtimet janë të kufizuara. Ajo kujtoi se ishte vetëm 9 vjeçe kur nisi gjithçka dhe se prania e kamerave në shtëpi u duk fillimisht diçka krejt normale për të dhe familjen e saj.

Kylie u shpreh se sezonet e para të emisionit kanë qenë më të veçantat dhe të mbushura me kujtime, duke theksuar se ai projekt e ka afruar shumë me familjen. Ajo shtoi se edhe sot familja përpiqet të kalojë kohë së bashku, pavarësisht angazhimeve të shumta dhe jetës së ngarkuar me punë dhe fëmijë.

Sipas saj, fama e hershme shpesh nuk kuptohej në atë kohë, ndërsa sot, duke e parë në retrospektivë, ajo dhe motra e saj Kendall Jenner e kuptojnë sa e pazakontë ka qenë fëmijëria e tyre nën vëmendjen e publikut. Ajo përmendi edhe momentet kur qendrat tregtare mbylleshin për shkak të pranisë së fansave dhe udhëtimet jashtë vendit që tërhiqnin turma të mëdha.

“Kur i shohim sot fotot, pyesim veten si ka qenë e mundur,” tha ajo, duke reflektuar mbi përjetimet e adoleshencës në qendër të vëmendjes.