Princi i Uellsit: Do të shohim nëse më vjen një ftesë për dasmën e Taylor Swift dhe Travis Kelce
Princi William ka lënë të hapur mundësinë e pjesëmarrjes në dasmën e shumëpërfolur të Taylor Swift dhe Travis Kelce, gjatë një interviste të fundit në radio në Mbretërinë e Bashkuar.
Duke folur në emisionin “Heart Breakfast”, Princi i Uellsit u pyet nëse kishte marrë një ftesë për ceremoninë e ardhshme të çiftit, të cilët janë fejuar dhe pritet të martohen, por kanë mbajtur detajet e dasmës private.
“Pa koment. Shpresoj dhe mendoj se mund të ketë një ftesë diku, por do ta shohim”, u shpreh William me humor.
Gjatë intervistës, ai tregoi gjithashtu se fëmijët e tij janë fansa të mëdhenj të Taylor Swift, veçanërisht Princesha Charlotte, e cila është “shumë e apasionuar” pas këngëtares amerikane. William kujtoi edhe koncertin e Eras Tour në vitin 2024, ku ai mori pjesë së bashku me fëmijët e tij, Princ George dhe Princesha Charlotte, duke e përshkruar si një eksperiencë “të jashtëzakonshme”.
“Atmosfera ishte e pabesueshme, mund të ndjeje dyshemenë që dridhej nga energjia e publikut”, tha ai.
William gjithashtu tregoi se kishte takuar Swift dhe Kelce pas koncertit, duke bërë edhe foto së bashku.
Taylor Swift dhe Travis Kelce kanë konfirmuar fejesën e tyre vitin e kaluar, por kanë zgjedhur të mbajnë planet e dasmës larg vëmendjes publike, duke preferuar një ceremoni private me rreth të ngushtë miqsh dhe familjarësh.
