Rrena me bisht! Nga “asnjë qindarkë” te 4.2 milionë euro për koncertin e Kanye West

Rrena me bisht! Nga “asnjë qindarkë” te 4.2 milionë euro për koncertin e Kanye West
Shteti shqiptar do të japë 4 milionë euro për koncertin që Kanye West do mbajë të shtunën në Tiranë.

Nga këmbëngulja se koncerti nuk do t’i kushtonte asnjë qindarkë buxhetit të shtetit, te realiteti i një financimi prej 4 milionë eurosh, duket se premtimet kanë ndryshuar.

Fillimisht, si Zyra e Kryeministrit, ashtu edhe Ministria e Turizmit, Kulturës dhe Sportit deklaruan se koncerti nuk do të financohej nga fondet publike. Por më 7 korrik, gjatë një inspektimi të punimeve në “Eagle Stadium”, një strukturë që po ndërtohet nga e para posaçërisht për zhvillimin e këtij aktiviteti muzikor, Kryeministri Edi Rama konfirmoi përfshirjen financiare të shtetit në organizimin e koncertit.

Si erdhi ky ndryshim “i papritur”?
Lajmin për organizimin e koncertit të Kanye West në Tiranë e bëri të ditur për herë të parë vetë Kryeministri Edi Rama, përmes një postimi në rrjetet sociale më 30 prill, ku e prezantoi ardhjen e artistit si një ngjarje historike për vendin.

Kanye West, një nga emrat më të njohur të muzikës botërore, është gjithashtu një figurë kontroverse për shkak të deklaratave të tij publike, përfshirë akuzat për antisemitizëm dhe komentet e tij mbi Adolf Hitlerin.

Në ditët e para pas njoftimit për koncertin, institucionet shqiptare mohuan që aktiviteti do të financohej nga fondet publike. Zyra e Kryeministrit i deklaroi se koncerti nuk do të sponsorizohej nga institucionet shqiptare.

Të njëjtën linjë mbajti edhe Ministri i Turizmit, Kulturës dhe Sportit, Blendi Gonxhja, i cili në një dalje mediatike më 1 maj deklaroi se shteti nuk do të mbulonte kostot e organizimit të eventit.

“Asnjë fond i shtetit shqiptar nuk shkon për organizimin e eventit, skenën dhe gjithë logjistikën e koncertit. Mbështetja jonë është në kapacitete njerëzore, për pjesën jashtë dhe të mbarëvajtjes së eventit”, u shpreh ministri.

Për të verifikuar pretendimet mbi financimin e koncertit, Citizens iu drejtua me një kërkesë për informacion Ministrisë së Turizmit, Kulturës dhe Sportit. Në përgjigjen e datës 10 qershor, ministria deklaroi se për organizimin e këtij aktiviteti “nuk është parashikuar asnjë fond publik, grant, subvencion apo mbulim shpenzimesh nga buxheti i shtetit”.

“Eventi financohet tërësisht nga organizatorët privatë”, theksohet në përgjigje.

Pa kaluar ende një muaj nga marrja e kësaj përgjigjeje, gjërat ndryshuan.

Më 6 korrik, Këshilli i Ministrave miratoi Aktin Normativ Nr. 3, “Për financimin e pjesshëm të organizimit të një aktiviteti kulturor-turistik me përmasa ndërkombëtare”, nënshkruar nga vetë Kryeministri Rama. Akti autorizon shumën 400,000,000 lekë, më shumë se 4 milionë euro, nga fondi rezervë i buxhetit të shtetit, që i shtohet Ministrisë së Turizmit, Kulturës dhe Sportit, në zërin “Transferta të brendshme”, program “Zhvillimi i turizmit”.

Vetë akti e emërton përfituesin: koncerti i Kanye West, që zhvillohet në Tiranë më 11 korrik 2026. Neni 3 i aktit autorizon ministrinë të nënshkruajë marrëveshje të drejtpërdrejtë me kompaninë organizatore të eventit, pa procedurë tenderimi publik.

Një ditë më vonë, më 7 korrik, gjatë inspektimit të punimeve për stadiumin në Kashar, Kryeministri Edi Rama e pranoi publikisht ndërhyrjen financiare të shtetit. “Shteti shqiptar është detyruar të ndërhyjë vetëm për të dhënë, jo dhjetëra milionë euro siç thonë sorrat e bulevardit, por 4 milionë që ne të garantojmë se mijëra njerëz që kanë prerë bileta nga 80 shtete […] të mund të marrin pjesë në këtë event”, u shpreh Rama.

Megjithatë, deklarata e Ramës dhe procedura e ndjekur e lë të pa sqaruar cilat zëra konkretë do të financohet me këto 4 milionë euro, cilat janë shërbimet apo kostot që do të mbulohen dhe se si lidhet kjo shumë drejtpërdrejt me garantimin e ardhjes së spektatorëve në aktivitet.

Menjëherë, shumë qytetarë i janë kundërpërgjigjur në rrjete sociale, duke argumentuar se ato para mund të shkonin për të zgjidhur problemet imediate të vendit.

A ka ngecur shitja e biletave?
Koncerti i Kanye West është një bast i madh financiar dhe logjistik për Shqipërinë. Deri në fund të majit, organizatorët deklaronin se ishin shitur rreth 25 mijë bileta, nga 60 mijë që është kapaciteti total i stadiumit të përkohshëm. Ndërsa, për ta bërë eventin ekonomikisht të leverdishëm, duhet të shiten të paktën 40 mijë bileta.

Situata me shitjen e biletave sot, nuk duket dhe aq pozitive. Një kërkim në faqen zyrtare të koncertit, tregon se një pjesë shume e madhe e vendeve janë bosh dhe shumë pak ditë përpara koncertit, ka ende mijëra bileta në shitje.Ndërkohë, i gjithë buxheti i thirrjes publike të Ministrisë së Kulturës për ngjarje kulturore dhe turistike, është 190 milionë lekë, shumë që nuk përbën as gjysmën e parave që taksapaguesit po ju japin sipërmarrësve që po organizojnë këtë koncert.