Skema e turqve për zhvatjen e kromit – Albchrome humbi 15 milionë euro

Skema e turqve për zhvatjen e kromit – Albchrome humbi 15 milionë euro

Turqit që menaxhojnë kromin në Shqipëri, veçanërisht me minierën në Bulqizë dhe fabrikat e pasurimit në Burrel e Elbasan me “Albchrome”, kanë gjetur një skemë perfekte për zhvatjen e pasurisë së shqiptarëve, me manovra të ngjashme me “Bankers”, duke i kanalizuar paratë në banka, sërish të lidhura me të njëjta grupe.

Vox News ka denoncuar në vijimësi skandale të njëpasnjëshme që lidhen me menaxhimin e nëntokës, ku institucionet shtetërore duket se janë totalisht në “gjumë”, aq sa vetëm japin miratime të kota dhe bëjnë raporte fiktive për vijimësinë e punës, kur në fakt duhet të jenë më kontrolluese dhe referuese, pasi këtu kemi të bëjmë me një rrjet të mirë organizuar.

Dokumentet që ka hulumtuar Vox News hedhin dritë mbi skandalet e radhës me koncesionet, duke qenë se kompania që ka marrë në menaxhim minierat dhe fabrikat bën bilance tepër të dyshimta, madje gjatë dy viteve të fundit që ka raportuar, ajo i ka nxjerrë me humbje, në shifra të mëdha. Nëse humbja në vitin 2024 ka qenë rreth 720 mijë euro, në vitin 2025, e njëjta kompani ka nxjerrë bilancin me humbje në një shifër tepër të lartë, plot 15 milionë euro.

Dyshimet janë se paratë e kromit shqiptar kanë shkuar në disa banka, të cilat i kanë dhënë kredi firmës koncesionare dhe tashmë janë paguar sa “qimet e kokës”, ndoshta me skemën e famshme të katapultimit të këtyre parave në sistemin bankar, për t’u humbur gjurmët. Nëse këta shtetarët tanë bënë të paditurin me kompaninë që menaxhon fushën naftëmbajtëse Patos – Marinzë, a do të bëjnë të njëjtën gjë me minierat e kromit?!

Faksimile: Raporti financiar i kompanisë Albchrome për vitin 2025, i publikuar në muajin gusht 2026 në Qendrën Kombëtare të Biznesit

Sipas dokumenteve zyrtare, kompania “Albchrome”, e cila ka ndryshuar disa herë pronarë, operon me dy koncesione. I pari i datës 1 qershor 2000, me afat 30 vjeçar për një fabrikë ferrokromi në Elbasan dhe dy miniera kromi në Përrenjas dhe Pojskë. Në vitin 2016, afati u shty deri më 31 dhjetor 2040.

Shoqëria ka marrë koncesionin tjetër më 22 qershor 2001, për një afat 30 vjeçar për një minierë kromi në Bulqizë, një fabrikë mineralesh në Bulqizë, një fabrikë për përzgjedhjen e mineraleve në Klos dhe një fabrikë Ferrokromi në Burrel. Në datën 25 korrik 2016, Kuvendi i Shqipërisë miratoi shtyrjen e periudhës së koncesionit deri më 31 dhjetor 2040.

E njëjta kompani ka publikuar ditët e fundit bilancin financiar në Qendrën Kombëtare të Biznesit, ku shkruan se “të deklarojë rezultatin financiar të shoqërisë për vitin 2025 me humbje në vlerën 1.436.436.389 lekë. Kjo humbje do të mbulohet nga fitimet e akumuluara të shoqërisë”. Një shumë tepër të madhe, mbi 15 milionë euro!

Në të njëjtin dokument shkruan se autorizon znj. Teuta Ustundag dhe znj. Zeynep Erbeyler, në cilësinë e administratorëve të shoqërisë, për të kryer veprimet e mëtejshme.

“Performanca financiare. Viti 2025 ishte një vit me paqëndrueshmëri të tregut, pas një periudhe mjaft të destabilizuar të çmimeve të energjisë elektrike, si dhe nga kriza e luftës në Ukrainë që kaloi industria. Gjatë vitit 2025 nuk u operua me kapacitet prodhues të plotë, për shkak të vendimeve të bordit duke vlerësuar ndikimin e tregut të energjisë elektrike si dhe kërkesës e shitjeve të produktit final”, thuhet në dokumente.

Por, pavarësisht se kompania del me një humbje tepër të madhe, mësohet se masivi i Bulqizës përmban rezervat më të mëdha të mineralit të kromit me cilësinë më të lartë në Shqipëri. “Ndërtimi i pusit të ri nr. 9 ka mundësuar thellimin e minierës nga niveli 17 për në nivelin 21, duke i dhënë akses në një pjesë të re të trupit dhe jeta e minierës është zgjatur me të paktën 15-17 vjet shtesë”, shkruan vetë kompania.

Faksimile: Kompania koncesionare Albchrome shkruan se ka marrë kredi dhe e ka pasur të pamundur që ta likuidojë në vitin 2025

Por ku shkuan paratë e kromit të Bulqizës?! Dokumentet e vetë kompanisë hedhin dritë mbi një skemë përvetësimi të nëntokës shqiptare, pasi një pjesë e mirë e parave që del nga prodhimi kanë shkuar pranë bankave të nivelit të dytë, të cilat i kanë dhënë kredi.

“Gjatë vlerësimit të parimit të vijueshmërisë, drejtimi ka marrë gjithashtu në konsideratë respektimin e kushteve të marrëveshjeve ekzistuese të financimit, duke përfshirë konventat financiare të lidhura me huamarrjen”, thuhet në dokumente.

Më tej, saktësohet se më 31 dhjetor 2025, shoqëria nuk ka përmbushur disa prej konventave financiare të përcaktuara në marrëveshjen e huasë dhe si rezultat pjesa e mbetur e huasë është klasifikuar si detyrim afatshkurtër në pasqyrën e pozicionit financiare.

“Deri në datën e autorizimit të këtyre pasqyrave financiare, huadhënësi nuk ka kërkuar shlyerje të menjëhershme të huasë dhe shoqëria vazhdon komunikimet me institucionin financiar lidhur me menaxhimin e detyrimeve të financimit”, vijon dokumenti.

Faksimile: Bilanci i kompanisë Albchrome për vitin 2024, me një humbje prej 720 mijë eurosh

Shfrytëzimi i pasurive në nëntokë është një nga skandalet më të mëdha që i bëhet Shqipërisë, nga të gjitha qeveritë përgjatë 35 viteve të fundit. Duke filluar nga nafta, kromi, hekur nikeli apo edhe metale të tjera që gjenden në vendin tonë. Pushteti qendror ka shpërdoruar në mënyrën më të keqe këto pasuri, duke ua dhënë me koncesion disa firmave me të kaluar tepër të dyshimtë, të cilat pasi mbushin mirë e mirë xhepat, largohen sikur të mos kishte ndodhur asgjë.

Megjithëse çështja “Bankers” u godit vetëm në sipërfaqe, duket se historia po përsëritet sërish me një nga pasuritë më të mëdha në nëntokën shqiptare, kromi në Bulqizë. Pronarët e koncesionit kanë ndryshuar disa duar, ndërkohë që aktualisht miniera e famshme po administrohet nga një firmë turke. Të dhënat që ka publikuar redaksia jonë flasin se drejtuesit e mëdhenj, por edhe administratorët e disa uzinave, kanë abuzuar rëndë me menaxhimin e kësaj pasurie, e cila ka si “pronar” vetë shqiptarët dhe jo ata që e menaxhojnë apo ata (qeveritarët qendrorë) që kanë dhënë leje.

Sipas dokumenteve që ka hulumtuar Vox News, në vitin 2024 firma koncesionare Albchrome ka regjistruar një humbje prej 720 mijë eurosh. Natyrshëm lindin disa pyetje; Ku shkojnë paratë e kromit në Shqipëri? A mos vallë bëhet një bilanc me humbje për të mos paguar detyrime? Sa janë fryrë kostot, duke paguar nënkontraktorë, me qëllim nxjerrjen e këtij bilanci? Çfarë pagash kanë administratorët, drejtorët, përgjegjësit e ata që menaxhojnë këtë pasuri të shqiptarëve?

©Copyright Vox News