Premier League/ Barazim dramatik, një penallti në kohën shtesë shmang humbjen për Liverpool në debutimin e Iraolës

Nisje zhgënjyese për Andoni Iraolën në stolin e Liverpoolit. “Të kuqtë” shpëtuan një pikë në sekondat e fundit, duke barazuar 2-2 në transfertën ndaj Newcastle.

Sfida në “St. James’ Park” nisi me ritëm të lartë dhe vendasit kaluan shumë shpejt në avantazh. Vetëm pesë minuta pas startit, Elanga goditi diagonalisht me të djathtën, duke mposhtur Alissonin dhe duke ndezur stadiumin.

Liverpooli reagoi menjëherë dhe kërkoi me ngulm golin e barazimit. “Të kuqtë” krijuan disa mundësi, por finalizimi mungoi dhe pjesa e parë u mbyll me avantazhin minimal të Newcastle.

Në fillimin e pjesës së dytë, Liverpooli më në fund gjeti golin. Në minutën e 55-të, Cody Gakpo realizoi një goditje spektakolare nga distanca, duke e dërguar topin në cepin e portës dhe duke vendosur shifrat në 1-1.

Por barazimi zgjati vetëm dy minuta. Në të 57-ën, Newcastle u nis në një kundërsulm të shpejtë dhe Willock, me një goditje të bukur me hark, riktheu avantazhin për vendasit. 2-1.

Në minutat e mbetura, Liverpooli u përpoq të reagonte, por skuadra e Iraolës nuk gjeti intensitetin e duhur. Rasti më i mirë erdhi në minutën e 69-të, kur Isak shpërdoroi një mundësi të artë, duke e dërguar topin mbi traversë.

Dhe kur Newcastle po përgatitej të festonte fitoren, drama shpërtheu në sekondat e fundit. Në kohën shtesë, Liverpooli fitoi një penallti. Përballë portierit, Szoboszlai ruajti qetësinë dhe në minutën e 99-të realizoi nga pika e bardhë, duke vendosur rezultatin përfundimtar, 2-2.

Një pikë e shpëtuar në ekstrem për Liverpoolin, por një debutim zhgënjyes për Iraolën, që duhet të presë për fitoren e parë në krye të “të kuqve”.