Edi Rama fajëson opozitën për dhunën në protesta

Nga një zyrë e dëmtuar nga zjarri në godinën e Kolegjit të Europës në Tiranë, kryeministri Edi Rama akuzoi opozitën se qëndron pas sulmeve ndaj institucioneve, duke i cilësuar ato si përpjekje të kundërshtarëve të tij politikë për të penguar përparimin e Shqipërisë drejt Bashkimit Europian.

“Këto janë duar që përpiqen ta ulin poshtë Shqipërinë sa herë përpiqet të shkojë lart”, deklaroi Rama, duke akuzuar opozitën se po përdor protestat për të nxitur trazira.

“Këto janë duart e një opozite që me maska të verbërish përpara kërkon ta rikthejë Shqipërinë aty ku nuk do të rikthehet kurrë”, shtoi ai.

Kryeministri nuk paraqiti prova për pretendimin se opozita qëndron pas sulmeve, por këmbënguli se dhuna nuk ishte vepër e studentëve. Ai u shpreh i gatshëm të dialogojë me protestuesit për shqetësimet dhe kërkesat e tyre.

“Studentët janë e ardhmja, shohin larg dhe duan të shkojnë më larg e më shpejt”, tha ai.

“Studentët janë gjithnjë të mirëpritur dhe për ta jemi gjithnjë gati të ulemi, të flasim, të diskutojmë dhe të gjejmë zgjidhje për gjërat që kërkojnë zgjidhje”, shtoi Rama.

Deklaratat e kryeministrit vijnë pas dy ditësh protestash në kryeqytet, të cilat nisën me kërkesat e studentëve për kushte më të mira në arsim dhe u përshkallëzuan në përplasje të dhunshme mes protestuesve dhe policisë.

Gjatë tubimeve, protestues hodhën kokteje molotovi dhe sende të forta, ndërsa policia ndërhyri me gaz lotsjellës dhe autobotë me ujë për shpërndarjen e turmave.

Përplasjet u shoqëruan me të lënduar, arrestime dhe dëmtime të pronës publike e private, ndërsa përdorimi i forcës nga policia ndaj protestuesve ka nxitur reagime dhe thirrje për hetime të pavarura.

Rama paralajmëroi se personat përgjegjës për sulmet ndaj institucioneve do të përballen me ligjin.

“Secili që ka bërë këtë katrahurë do të paguajë, sepse Shqipëria nuk do të kthehet më kurrë pas”, deklaroi ai.

“Janë orë të vështira, por orë që do t’i kalojmë të gjithë së bashku, sepse Shqipëria do të vazhdojë të ngjitet, do të vazhdojë në rrugën e saj”, përfundoi Rama.