Përleshjet mes policisë dhe protestuesve në Tiranë
PublishedOctober 18, 2026
Një kordon policor, i pajisur me mburoja dhe maska kundër gazit, qëndron mes tymit dhe qindra gurëve të kalldrëmit të shpërndarë në rrugë pas përleshjeve me protestuesit. Foto: Xhemali Moku/BIRN.
Protestat kundër qeverisë së kryeministrit Edi Rama u shoqëruan të shtunën, më 17 tetor, me përplasje të ashpra mes demonstruesve dhe forcave të policisë në bulevardin “Dëshmorët e Kombit” në Tiranë, duke shënuar ditën e pestë radhazi të trazirave në kryeqytet.
Rrugët përreth institucioneve qeveritare u mbuluan nga gazi lotsjellës, ndërsa forcat e policisë, të pajisura me skafandra, mburoja dhe mjete të tjera mbrojtëse, u përballën me protestues që hodhën gurë dhe sende të forta.
Policia përdori gjithashtu autobotë me topa uji, plumba gome për të shpërndarë turmën. Në disa zona shpërthyen flakë, ndërsa gurët e kalldrëmit të shkulur nga rruga mbuluan bulevardin.
Fotografitë e realizuara nga fotoreporteri i BIRN, Xhemali Moku, dokumentojnë disa nga momentet më të tensionuara të përleshjeve, përdorimin e forcës nga policia dhe kaosin që përfshiu qendrën e Tiranës.
Protestat, të nisura nga të rinjtë dhe studentët me kërkesën për dorëheqjen e kryeministrit Edi Rama, janë përhapur gjatë javës në qytete të tjera të Shqipërisë, ndërsa përshkallëzimi i dhunës ka ngritur shqetësime për sigurinë publike dhe respektimin e të drejtës për tubim paqësor.
Protestues me fytyra të mbuluara lëvizin mes tymit dhe mjeteve piroteknike gjatë përplasjeve me policinë pranë bulevardit “Dëshmorët e Kombit” në Tiranë, më 17 tetor 2026. Foto: Xhemali Moku/BIRN.
Punonjës të forcave të ndërhyrjes policore strehohen pas mburojave, ndërsa rruga përpara tyre është e mbuluar me gurë kalldrëmi dhe tym gjatë përleshjeve me protestuesit në Tiranë. Foto: Xhemali Moku/Reporter.al.
Një efektiv policie, i pajisur me maskë kundër gazit dhe mbrojtëse trupore, qëndron pas mburojave gjatë përplasjeve me protestuesit në qendër të Tiranës. Pranë tij shihet një objekt cilindrik në ajër. Foto: Xhemali Moku/BIRN
Disa efektivë policie ndërhyjnë ndaj një personi të shtrirë ose të ulur pranë hyrjes së një ndërtese, gjatë përplasjeve të së shtunës në Tiranë. Foto: Xhemali Moku/BIRN.
Një kordon policor, i pajisur me mburoja dhe maska kundër gazit, qëndron mes tymit dhe qindra gurëve të kalldrëmit të shpërndarë në rrugë pas përleshjeve me protestuesit. Foto: Xhemali Moku/BIRN.
Forca të shumta policie, të pajisura me mburoja dhe mjete mbrojtëse, lëvizin në formacion përgjatë bulevardit “Dëshmorët e Kombit” gjatë protestës kundër qeverisë. Foto: Xhemali Moku/BIRN.
Një autobot i Policisë së Shtetit dhe efektivë të forcave të ndërhyrjes mes ujit, tymit dhe gurëve të shpërndarë në bulevardin “Dëshmorët e Kombit”, gjatë përplasjeve të së shtunës. Foto: Xhemali Moku/BIRN.
Një protestues me maskë mbrojtëse mban në dorë një cilindër municioni 40 mm, me mbishkrimin “Triple Charge CS”, gjatë protestës së 17 tetorit në Tiranë. Foto: Xhemali Moku/BIRN.
Flakë të mëdha përfshijnë një pjesë të rrugës pranë një automjeti të blinduar të policisë, ndërsa uji dhe tymi mbulojnë zonën e përplasjeve në Tiranë. Foto: Xhemali Moku/BIRN.
Një efektiv policie mban mbi kokë një arkë druri, ndërsa kalon mes gurëve të kalldrëmit dhe mbetjeve të shpërndara në rrugë, në një zonë të mbuluar nga tymi gjatë përplasjeve me protestuesit. Foto: Xhemali Moku/BIRN.
