“Fytyra e re” e Egnatias, ja lojtarët ku bazohet ekipi

Egnatia do të zbresë këtë të diel në Vlorë për t’u përballur me Flamurtarin, një nga sfidat më interesante të javës së pestë në Superiore.

Kampionët në fuqi e nisin këtë duel me një moral të qetë dhe të kontrolluar, duke pasur parasysh se rezultatet në dy javët e fundit kanë qenë pozitive, por mbi të gjitha kanë treguar një skuadër që po evoluon gradualisht. Për Edlir Tetovën, ky është një sezon që kërkon durim, sepse edhe lëvizjet kanë qenë të shumta dhe rezultatet pritet të vijnë gradualisht.

Pavarësisht rezultateve, Tetova nuk ka ndryshuar tonin e tij realist. Ai e di se skuadra është ende në proces ndërtimi dhe se aspektet taktike, ritmi i lojës dhe lidhjet mes repartesh kërkojnë më shumë kohë. Duke u bazuar në eksperiencën e viteve të kaluara, trajneri ka zgjedhur të mos ushqejë eufori, por të mbajë të lartë nivelin e përqendrimit. Mirëpo, tani që “marshi” u ndërrua, në Rrogozhinë shpresojnë tek vijimësia e rezultateve pozitive që ta mbajnë në vendet e para në renditje.

BINDIN AFRIMET – Megjithatë, edhe pse Tetova ka kërkuar kohë, faktet në terren flasin në favor të politikës së klubit. Të katër golat e shënuar nga Egnatia në këtë start kampionati mbajnë vulën e lojtarëve të afruar në merkaton e fundit. Nikola Buriç dhe Alesandro Albanese ishin protagonistë ndaj Tiranës, duke treguar se kanë aftësinë të bëhen pika referimi në repartin ofensiv. Flamur Ruçi, një tjetër prurje e re, i dha fitoren skuadrës kundër Bylisit, ndërsa Xheferson gjeti rrugën e rrjetës në ndeshjen kundër Elbasanit. Nëse në letër afrimet duken premtuese, në fushë ato po e vërtetojnë me fakte konkrete, duke i dhënë Egnatias një dimension ndryshe dhe një shtrirje më të gjerë të forcës në sulm. Edhe ndaj Flamurtarit, duket se shpresat për të gjetur rrugën e rrjetës dhe fitoren janë pikërisht tek lojtarët që kanë ardhur së fundmi dhe që po i japin pikët kampionëve.

PA VARËSI – Një tjetër element që bie në sy është fakti se skuadra nuk duket e varur nga asnjë individ i vetëm. Katër golashënues të ndryshëm në katër ndeshje rresht japin idenë e një grupi ku përgjegjësia shpërndahet dhe ku secili mund të bëhet vendimtar. Kjo është një risi për Tetovën, i cili në të kaluarën ka pasur nevojë të mbështetej tek disa emra të caktuar në momentet e vështira. Tashmë duket se ka më shumë alternativa, më shumë thellësi në stol dhe më pak rrezik nga mungesat apo dëmtimet. Ky balancim e bën Egnatian një kundërshtar më të paparashikueshëm dhe më të vështirë për t’u lexuar nga rivalët. Megjithatë, me kalimin e javëve, ndoshta kampionët mund të krijojnë varësi nga ndonjë lojtar që mund të spikasë mbi të tjerët, gjë që nuk është vënë re deri më tani.

© BalkanWeb