Robbie Williams rrëfen betejën me sindromën Tourette
Këngëtari i njohur britanik Robbie Williams ka bërë një zbulim personal, duke treguar hapur se vuan nga sindroma Tourette. Ai pranoi se kjo gjendje e shoqëron çdo ditë dhe “gjithmonë kërkon trajtim”.
Zbulimi në një podcast
Williams foli për herë të parë publikisht rreth kësaj gjendjeje në episodin e parë të sezonit të ri të podcastit “I’m ADHD! No You’re Not”, me Paul Whitehouse dhe Dr. Mine Conkbayr. Ai tregoi se sapo kishte kuptuar se mendimet ndërhyrëse dhe shqetësimet që kishte prej kohësh ishin shenja të sindromës Tourette.
“Pardje po ecja në rrugë dhe e kuptova se këto mendime ishin pjesë e saj”, tha këngëtari.
Frika nga performancat live
Edhe pse është një artist me eksperiencë shumëvjeçare, Robbie pranoi se ende ka frikë nga turnetë dhe performancat live.
“Kur më thonë se do të jem i emocionuar për turnetë, përgjigjja ime është jo. Jam i tmerruar. Kam mësuar t’i fsheh mirë ndjenjat e mia, por në të vërtetë ndihem ndryshe nga çfarë shfaqet në skenë,” u shpreh ai.
Mbështetja e familjes
Një rol të madh në përballjen me këtë sfidë e ka gruaja e tij, Aida, e cila e inkurajon vazhdimisht. “Mund të mos performosh më në stadium, dhe je me fat që e ke këtë mundësi,” i thotë ajo para çdo turneu.
Testimet dhe gjendja shëndetësore
Williams rrëfeu gjithashtu se së fundmi kishte bërë edhe një test për autizëm, i cili rezultoi negativ, por që tregoi disa “tipare autistike”, të lidhura kryesisht me ankthin kur largohej nga hapësira e tij e sigurt – shtrati
Çfarë është sindroma Tourette?
Sindroma Tourette është një çrregullim neurologjik i trashëguar, i karakterizuar nga tiket motorike dhe vokale që përsëriten në mënyrë të pavullnetshme.
• Për diagnozë, një person duhet të ketë disa tikë motorikë dhe të paktën një tik vokal për një periudhë mbi një vit.
• Shfaqet më shpesh tek fëmijët 5–7 vjeç dhe është më e zakonshme tek djemtë.
• Vlerësohet se rreth 1 në 100 fëmijë në moshë shkollore e përjetojnë këtë gjendje.
Edhe pse shpesh shfaqet që në moshë të hershme, sindroma Tourette mbetet një gjendje me të cilën individët mund të mësojnë të bashkëjetojnë, duke kërkuar trajtime dhe mbështetje të vazhdueshme.
